آن لائن ٹریڈنگ کے نام پرفراڈ، سرغنہ گرفتار

دہرادون/نینی تال، 4 مارچ (یو این آئی) اتراکھنڈ پولیس کی اسپیشل ٹاسک فورس (ایس ٹی ایف) نے سائبر فراڈ کے ایک ایسے معاملے کا انکشاف کیا ہے جس میں آن لائن ٹریڈنگ کے نام پر معصوم لوگوں سے دھوکہ کیا جاتا تھا۔ ایس ٹی ایف نے ایسے ہی ایک سرغنہ کو گرفتار کیا ہے جس نے اب تک مختلف ریاستوں میں لوگوں سے ایک کروڑ روپے سے زیادہ کا فراڈ کیا ہے۔
ایس ٹی ایف کے سینئر سپرنٹنڈنٹ آف پولیس (ایس ایس پی) آیوش اگروال کے مطابق، الموڑہ میں ایک ٹیچرسے اسی سال فروری میں آن لائن ٹریڈنگ کے نام پر 30 لاکھ روپے کی ٹھگی کرلی گئی تھی۔ متاثرہ شخص آن لائن ٹریڈنگ کے لالچ میں ایسے ہی ایک اشتہار کا شکار ہو گیا۔ یہاں سے دھوکہ دہی کا کھیل شروع ہوا۔ جب تک ٹیچر کچھ سمجھ پاتا، تب تک وہ 30 لاکھ روپے گنواچکاتھا۔
اس کے بعد متاثرہ نے اتراکھنڈ پولس کے سائبر سیل میں شکایت درج کرائی۔ ایس ٹی ایف فوراً حرکت میں آ گئی۔ ایس ایس پی اگروال کی ہدایت پر کیس کی تفتیش سائبر سیل کے انسپکٹر للت موہن کو سونپی گئی۔ کافی کوشش کے بعد، ایس ٹی ایف کی ٹیم نے ملزم چندن کمار یاد مانک پور، پوسٹ پیرپینتی، ملک پور دیارہ، بھاگلپور، بہار کو جے پور سے گرفتار کیا۔
تفتیش کے دوران پولیس کو پتہ چلا کہ ملزم دہلی، ہریانہ، پنجاب، اتر پردیش، تلنگانہ، کرناٹک، جھارکھنڈ وغیرہ ریاستوں میں آن لائن ٹریڈنگ کے نام پر کئی لوگوں کے ساتھ ٹھگی کرچکا ہے۔ اس کے خلاف 11 شکایات موصول ہوئی ہیں۔
فی الحال تفتیش کے دوران پولیس نے ایک کروڑ روپے کی دھوکہ دہی کا پتہ لگایا ہے۔ مسٹر اگروال نے بتایا کہ ملزمین ڑھگی کے اس کھیل کے آغاز سوشل میڈیا سائٹ پر آن لائن ٹریڈنگ کے نام پر اشتہارات جاری کرتے ہیں۔ کچھ لوگ ان کے جھانسے میں آجاتے ہیں۔
متاثرہ ٹیچر کو نئی کمپنی کا آئی پی او خریدنے کے نام پر تین گنا منافع کا خواب دکھایا گیا۔ ملزم نے متاثرہ کو ڈیجیگامیکس نامی موبائل ایپلیکیشن بھیجی اور سرمایہ کاری کے نام پر 30 لاکھ روپے جعلی اکاؤنٹس میں جمع کروالئے۔ اس کے بعد ملزم نے اے ٹی ایم سے وہ رقم نکال لی۔
متاثرہ کو یقین دلانے کے لیے، اسے ڈیش بورڈ کے ذریعے اس کے اکاؤنٹ میں درج تین گنا زیادہ رقم بھی دکھائی گئی۔ تفتیش کے دوران پولیس کو پتہ چلا کہ اس نے کئی لوگوں کے فرضی ناموں پر فرم بنا کر بینکوں میں کھاتے کھولے ہیں۔ جسے وہ خود استعمال کرتا ہے۔ ملک کی کئی ریاستوں میں ان بینک کھاتوں کے خلاف سائبر کرائمز کے کیس درج ہیں۔
ایس ٹی ایف ٹیم نے ملزم سے تین موبائل فون، لیپ ٹاپ، کئی چیک بک، پاس بک، بینک چیک، ڈیبٹ کارڈ، سم کارڈ، جعلی مہریں، جعلی آدھار کارڈ اور پین کارڈ بھی برآمد کیا ہے۔ ٹیم کو ملزم کے موبائل فون سے اس کاروبار میں استعمال ہونے والے کئی اہم شواہد اور دستاویزات بھی ملی ہیں۔ جس میں کئی ای میل اکاؤنٹس، بینک اکاؤنٹس، جعلی فرموں اور کمپنیوں کے نام شامل ہیں۔
ملزم جے پور کے مہیش نگر تھانہ ڈی-65 سندر وہار کالونی میں رہتا ہے اور فی الحال سدھیشور ہنومان مندر کے نزدیک ڈی-162، مرلی پورہ میں راجندر موہن شرما کے کرائے کے مکان سے اس دھوکہ دہی کے کام کو انجام دے رہا تھا۔ پولیس نے ملزم کو ہفتہ کی شام یہیں سے گرفتار کرلیا۔
ایس ٹی ایف کو ملزم سے کئی اہم معلومات ملی ہیں۔ فی الحال ایس ٹی ایف کی ٹیم دیگر ریاستوں کی پولیس سے رابطہ کر کے ملزم کے جرائم کی کنڈلی نکال رہی ہے۔