ایران، سعودی عرب، مصر، متحدہ عرب امارات اورارجنٹینا بنیں گے برکس کے نئے رکن

جوہانسبرگ (یو این آئی) ارجنٹینا، ایران، سعودی عرب، مصر اور متحدہ عرب امارات (یو اے ای) برکس گروپ (برازیل، روس، ہندوستان، چین اور جنوبی افریقہ) کے نئے رکن بنیں گے۔
برازیل کے نیوز پورٹل یو او ایل نے سربراہی اجلاس کے حتمی دستاویز کے مسودے کا حوالہ دیتے ہوئے یہ اطلاع دی ہے۔رپورٹ کے مطابق جغرافیائی توازن برقرار رکھنے کے لیے ایک اور افریقی ملک کو اس فہرست میں شامل کیا جا سکتا ہے۔ برکس سربراہی اجلاس 22 سے 24 اگست تک جوہانسبرگ میں ہو رہا ہے۔
کانفرنس میں چین، ہندوستان، برازیل اور جنوبی افریقہ کے رہنما شرکت کر رہے ہیں۔ روس کی نمائندگی وزیر خارجہ سرگئی لاوروف کر رہے ہیں۔ روسی صدر ولادیمیر پوتن نے ویڈیو کانفرنسنگ کے ذریعے سربراہی اجلاس میں شرکت کی۔حال ہی میں ارجنٹینا، ایران، الجزائر، تیونس، ترکی، سعودی عرب اور مصر سمیت کل 23 ممالک نے برکس میں شمولیت اختیار کرنے کی خواہش کا اظہار کیا ہے۔