جنتا دل سیکولر نے جاری کی 93 امیدواروں کی پہلی فہرست
بنگلورو(ایجنسیاں):آئندہ سال کے شروع میں کرناٹک کے اسمبلی انتخاب ہونا ہے، اس کے پیش نظر سرگرمیاں ابھی سے شروع ہو گئی ہیں۔ 2023 میں ہونے والے کرناٹک اسمبلی انتخاب کو لے کر بی جے پی، کانگریس اور جنتا دل سیکولر سمیت سبھی چھوٹی بڑی سیاسی پارٹیوں نے کمر کس لی ہے اورقومی آواز ڈاٹ کام کی خبر کے مطابق جنتا دل سیکولر نے تو پیر کے روز اپنے امیدواروں کی پہلی فہرست بھی جاری کر دی۔ جنتا دل سیکولر نے اپنے آفیشیل ٹوئٹر ہینڈل سے 93 امیدواروں پر مبنی پہلی فہرست جاری کی ہے۔
جاری فہرست کے مطابق سابق وزیر اعلیٰ ایچ ڈی کماراسوامی چناپٹنا سے انتخاب لڑیں گے اور ان کے بیٹے نکھل کو رام نگر سے ٹکٹ ملا ہے۔ اس کے علاوہ جنتا دل سیکولر نے چامنڈیشوری سے جی ٹی دیوگوڑا کو ٹکٹ دیا ہے، ساتھ ہی ان کے بیٹے ہریش گوڑا ہنسور سے الیکشن لڑیں گے۔دوسری طرف بی جے پی نے بھی کرناٹک اسمبلی انتخاب کو لے کر تیاریاں شروع کر دی ہیں۔ گزشتہ ہفتے ہوئی ایک داخلی میٹنگ میں بی جے پی کے سینئر لیڈران نے کرناٹک میں آئندہ انتخاب کو لے کر پارٹی کی تیاریوں کا جائزہ لیا۔
2023 ರ ವಿಧಾನಸಭಾ ಚುನಾವಣೆಯ ಜಾತ್ಯತೀತ ಜನತಾದಳ ಪಕ್ಷದ 93 ಕ್ಷೇತಗಳ ಅಭ್ಯರ್ಥಿಗಳ ಪಟ್ಟಿಯನ್ನು ಮಾಜಿ ಮುಖ್ಯಮಂತ್ರಿಗಳಾದ ಶ್ರೀ @hd_kumaraswamy ಅವರ ಉಪಸ್ಥಿತಿಯಲ್ಲಿ ಪಕ್ಷದ ರಾಜ್ಯಾಧ್ಯಕ್ಷರಾದ ಶ್ರೀ ಸಿ ಎಂ ಇಬ್ರಾಹಿಂ ಅವರು ಮಾಧ್ಯಮ ಸುದ್ದಿಗೋಷ್ಠಿ ಮುಖಾಂತರ ಬಿಡುಗಡೆಗೊಳಿಸಿದರು. pic.twitter.com/Y4LCFr51uu
— Janata Dal Secular (@JanataDal_S) December 19, 2022
بتایا جاتا ہے کہ اس میٹنگ میں بی جے پی لیڈران نے کانگریس لیڈر راہل گاندھی کی ’بھارت جوڑو یاترا‘ کو لے کر بھی اپنے خیالات سبھی کے سامنے رکھے۔
میڈیا رپورٹس کے مطابق بی جے پی کی میٹنگ میں مرکزی موضوع ووکالیگا اور لنگایت طبقہ تھا۔ پارٹی میں کچھ ایسا خاکہ تیار کرنے کی کوشش کی جا رہی ہے کہ مذکورہ دونوں طبقات کے آس پاس کس طرح کام کرنا چاہیے، کیونکہ ریاست میں کسی بھی پارٹی کی جیت کے لیے ان دونوں کی حمایت بہت اہم ہے۔ جنتا دل سیکولر کا ووکالیگا طبقہ میں دبدبہ ہے، خصوصاً پرانے میسور علاقہ میں، جہاں بی جے پی نے 2018 کے اسمبلی انتخاب میں اچھی کارکردگی کا مظاہرہ نہیں کیا تھا۔
واضح رہے کہ کرناٹک اسمبلی میں مجموعی طور پر 224 نشستیں ہیں اور حکومت سازی کے لیے 113 اراکین کی ضرورت ہوتی ہے۔ اگر 2018 کے اسمبلی انتخاب کی بات کی جائے تو بی جے پی نے ریاست میں 104 سیٹوں پر جیت حاصل کی تھی اور کانگریس کو 80 سیٹوں پر کامیابی ملی تھی۔ ایچ ڈی کماراسوامی کی پارٹی جنتا دل سیکولر نے 37 سیٹوں پر جیت حاصل کی تھی۔ بعد ازاں کانگریس اور جنتا دل سیکولر نے مل کر ریاست میں حکومت تشکیل دی تھی۔ لیکن پھر توڑ پھوڑ کے ذریعہ بی جے پی نے ریاست میں اقتدار پر قبضہ کر لیا۔
