مودی کو خط لکھ کر سالگرہ پر مبارکباد دی اور قابل اعتراض بیانات پر جتایا سخت اعتراض
نئی دہلی (یواین آئی) کانگریس کے صدر ملکارجن کھڑگے نے وزیر اعظم نریندر مودی کو خط لکھ کر ان کی سالگرہ پر مبارکباد دی اور کہا کہ لوک سبھا میں اپوزیشن لیڈر راہل گاندھی کے بارے میں قابل اعتراض بیانات دیئے جا رہے ہیں، جن کو روکنا چاہیے اور ملزمان کے خلاف کارروائی کی جانی چاہیئے۔
مسٹر کھڑگے نے کہاکہ’’محترم وزیر اعظم، سب سے پہلے میں آپ کو سالگرہ کی بہت بہت مبارکباد دیتا ہوں۔ اس کے ساتھ میں آپ کی توجہ ایک ایسے مسئلے کی طرف مبذول کرانا چاہتا ہوں جس کا براہ راست تعلق جمہوریت اور آئین سے ہے۔ آپ کو معلوم ہوگا کہ لوک سبھا میں قائد حزب اختلاف مسٹر راہل گاندھی کے خلاف انتہائی قابل اعتراض، پرتشدد اور بیہودہ بیانات کا سلسلہ جاری ہے۔ مجھے افسوس کے ساتھ کہنا پڑتا ہے کہ بھارتیہ جنتا پارٹی اور آپ کے اتحادیوں کے لیڈروں کی طرف سے استعمال کی گئی پرتشدد زبان مستقبل کے لیے مہلک ہے۔ دنیا حیران ہے کہ مرکزی حکومت میں ریلوے کے وزیر مملکت، بی جے پی کی حکومت والی اتر پردیش کے وزیر، لوک سبھا میں اپوزیشن لیڈر کو نمبر ون دہشت گرد کہہ رہے ہیں۔ مہاراشٹرا میں آپ کی حکومت میں اتحادی جماعت کا ایک ایم ایل اے اور لوک سبھا میں اپوزیشن لیڈر کی زبان کاٹنے والے کو 11 لاکھ روپے انعام دینے کا اعلان کر رہے ہیں۔ دہلی میں بی جے پی کے ایک رہنما اور سابق ایم ایل اے اسے دھمکی دے رہے ہیں کہ وہ ان کی دادی جیسا ہو جائے گا۔
کانگریس صدر نے کہاکہ ’’ہندوستانی ثقافت دنیا بھر میں عدم تشدد، ہم آہنگی اور محبت کے لیے جانی جاتی ہے۔ یہ نکات ہمارے ہیروز نے سیاست میں معیار کے طور پر قائم کیے تھے۔ گاندھی جی نے ان معیارات کو برطانوی دور حکومت میں ہی سیاست کا ایک اہم حصہ بنایا تھا۔ آزادی کے بعد پارلیمانی حلقوں میں حکمران جماعت اور اپوزیشن کے درمیان باعزت اختلاف کی ایک طویل تاریخ رہی ہے۔ انہوں نے ہندوستانی جمہوریت کے وقار کو بڑھانے کا کام کیا۔ کانگریس کے کروڑوں کارکنان اور لیڈران اس کو لے کر بہت پریشان ہیں۔ کیونکہ نفرت کی ایسی طاقتوں کی وجہ سے بابائے قوم مہاتما گاندھی، اندرا گاندھی اور راجیو گاندھی کو شہید ہونا پڑا۔ حکمران جماعت کا یہ سیاسی رویہ جمہوری تاریخ کی بد ترین مثال ہے۔
انہوں نے کہاکہ ’’میں آپ سے درخواست کرتا ہوں اور توقع کرتا ہوں کہ براہ کرم اپنے قائدین پر نظم و ضبط برقرار رکھنے کے لیے مناسب طرز عمل کی ہدایات دیں۔ ایسے بیانات کے خلاف سخت قانونی کارروائی کی جائے تاکہ ہندوستانی سیاست کو زوال پذیر ہونے سے بچایا جا سکے۔ کوئی ناخوشگوار واقعہ رونما نہ ہو۔ مجھے یقین ہے کہ آپ ان لیڈروں کو پرتشدد بیانات دینے سے فوری طور پر روکنے کے لیے ضروری کارروائی کریں گے۔ ہم نے اس موضوع پر ایک خط بھی لکھا ہے، ہمیں امید ہے کہ آپ اس خط کا جواب دیں گے۔
