مولانا سید اسجد مدنی ایک نظر میں

اے آزادقاسمی
مولانا سید اسجد مدنی (پیدائش 15 دسمبر 1957 دیو بند) ملک کی مؤقرتنظیم جمعیۃعلماء ہند کے نائب صدر،جمعیۃ علماء ہند قانونی امداد کمیٹی کے آل انڈیا سربراہ، مدرسۃ البنات انٹرکالج دیوبندکے ڈائرکٹر،مولانا حسین احمد مدنی ایجوکیشنل ٹرسٹ کے سربراہ، اورملک کے اکثرریاستوں کی دینی وعصری تعلیم گاہوں کے سرپرست ہیں خاص کر معہدتحفیظ القرآن نوادہ ہزاری باغ جھارکھنڈ، مدرسہ مدنیہ چلمل بارہ ہاٹ، بانکابہار اورماڈرن مدنی پبلک اسکول سنگرام مدھوبنی بہاروغیرہ قابل ذکرہیں۔
ہندوستان کے معروف مدنی خاندان کے چشم و چراغ، شیخ الاسلام حضرت مولانا سید حسین احمد مدنی کے فرزند اصغر اور معروف وقدیم ملی تنظیم جمعیۃ علماء ہند کے سینئر نائب صدر بھی ہیں، قومی یکجہتی اور آپسی رواداری کے علمبردار کی حیثیت سے منفر د شناخت رکھنے کے علاوہ وہ جمعیۃ علماء ہند کے موجودہ صدر مولانا سید ارشد مدنی کے دست راست اور برادر اصغر بھی ہیں، مولانا اسجد مدنی کو جمعیۃ علماء ہند قانونی امداد کمیٹی کا سربراہ جناب گلزاراحمد اعظمیؒ کی رحلت کے بعد 10 ستمبر 2023 کو بنایا گیا۔ یہ کمیٹی 2007 سے ان بے قصور مسلمانوں کے دفاع اور قانونی امداد کے لیے سرگرم عمل ہے۔ جنھیں دہشت گردی کے جھوٹے مقدمات کا سامنا ہے، ایک اندازے کے مطابق تین سوسے زائد مسلم نو جوانوں کو دہشت گردی کے مقدمات سے بری کرانے میں اس کمیٹی کا بڑا رول رہا ہے۔ جن میں کئی محروسین کوملک کی مختلف عدالتوں کے ذریعہ سزائے موت سنائی جا چکی تھی۔
اساتذہ حفظ قرآن کریم: حضرت مولانا قاری اصغر علی صاحب استاذ دار العلوم دیوبند، مجاز شیخ الاسلام حضرت مولانا حسین احمد مدنی۔قاری محمد کامل صاحب استاذ دار العلوم دیو بند۔
حفظ قرآن کریم کے بعد:
ابتدائی تعلیم: مدرسہ شاہی مراد آباد اور دارالعلوم دیو بند میں فارسی اور عربی کی ابتدائی تعلیم حاصل کی۔
دارالعلوم دیو بند کے اساتذہ: حضرت مولانا عبد الحق دامانی صاحب مجاز شیخ الاسلام حضرت مولانا حسین احمد مدنی۔حضرت مولانا معراج الحق صاحب، حضرت مولانا وحید الزماں کیرانوی حضرت مولانا نصیر احمد خاں سابق شیخ الحدیث دارالعلوم دیو بند، حضرت مولانا سعید احمد پالن پوری، حضرت مولانا نعمت اللہ اعظمی، حضرت مولانا ارشد مدنی صاحب
سنِ فراغت: 1986 دار العلوم دیوبند۔:
نکاح: یکم جنوری 1989ء
جمعیۃ علماء ہند میں شمولیت: 1987 میں جمعیۃ علماء ہند کے سکریٹری کے عہدہ پر فائز ہوئے۔ 2006 میں جمعیۃ علماء ہند کی ورکنگ کمیٹی کے ممبر نامزد ہوئے۔ 2023 میں جمعیۃ علماء ہند کی جنرل باڈی نے اپنے ممبئی اجلاس انجمن اسلام میں نائب صدر نامزد کیا۔
مولانا سید اسجد مدنی دیوبندی مکتبہ فکر سے تعلق رکھنے والی علماء کے سب سے بڑی اور قدیم تنظیم جمعیۃ علماء ہند کے نائب صدر کے علاوہ، جمعیۃ علماء حلال فاؤنڈیشن (جے یو ایچ سرٹیفکیشن) کے منیجنگ ڈائریکٹر اور مولانا حسین احمد مدنی ایجوکیشنل ٹرسٹ دیو بند کے چیئر مین بھی ہیں۔ وہ جامعہ اسلامیہ للبنات انٹر کالج (انسٹی ٹیوٹ فار گرلز ایجوکیشن) دیو بند کے بانی و چیئر مین کے علاوہ بہار، جھارکھنڈ، اڑیسہ، مغربی بنگال کے علاوہ ملک کے دیگر پسماندہ علاقوں کی سب سے بڑی اقلیت کے پسماندہ اور غریب سمجھے جانے والے علاقوں میں فلاحی و خیراتی سرگرمیوں کے ذمہ دار بھی ہیں۔ جن کے واسطہ سے پینے کے پانی کے انتظامات، بیواؤں کے مکانات کے بندوبست، جسمانی طور پر معذور لوگوں کی خبر گیری، مدنی ٹیکنیکل انسٹی ٹیوٹ فار گرلز اور ضرورت مند لوگوں کے لیے مفت طبی امداد کی فراہمی جیسے انسانی بھلائی کے کاموں میں خاص دلچسپی رکھتے ہیں۔
تصنیفی و تالیفی خدمات: جمعیۃ علماء ہند کی خدمات، یکساں سول کوڈ اور جمعیۃ علماء ہند کی خدمات، ریلیف و بازآبادکاری میں جمعیۃ علماء ہند کی عملی جد و جہد، بابری مسجد مقدمہ اور جمعیۃ علماء ہند کی مساعی جمیلہ جمعیۃ علماء ہند کی خدمات بعہد صدارت مولانا سید ارشد مدنی جلد نمبر ہ کے علاوہ جمعیۃ علماء ہند کی ملکی وملی خدمات پر مشتمل کتابچے اور مضامین جو وقتا فوقتا جمعیۃ علماء ہند کے شعبہ نشر و اشاعت سے شائع ہوتے رہے۔ملک کے مؤقراخبارات میں شائع ہوتے رہے ہیں۔ مولانا سید اسجدمدنی قبائلی علاقوں میں خدمت خلق کوبڑی ہی جانفشانی سے انجام دے رہے ہیں اورمظلوموں کی دادرسی میں پوری طرح سے سرگرم عمل ہیں اللہ تعالیٰ ان کے اس عمل کو قبولیت سے سرفرازفرمائے اوریوں ہی ان سے انسانیت کی فلاح وبہبودکے کام لیتارہے۔ آمین۔