نئی دہلی ( یواین آئی) بہار کے سابق وزیر اعلی اور راشٹریہ جنتا دل کے صدر لالو پرساد یادو نے مبینہ ‘’زمین کے بدلے نوکری‘گھوٹالہ سے متعلق ایک معاملے میں نچلی عدالت کی کارروائی پر روک لگانے کے لیے سپریم کورٹ سے رجوع کیا ہے۔عدالت عظمیٰ کی ویب سائٹ کے مطابق جسٹس ایم ایم سندریش اور جسٹس این کوٹیشور سنگھ کی بنچ ان کی (لالو یادو) کی درخواست پر 18 جولائی کو سماعت کرے گی۔29 مئی کو دہلی ہائی کورٹ نے مسٹر یادو کی نچلی عدالت کی کارروائی پر روک لگانے کی درخواست کو مسترد کر دیا تھا۔ اس کے خلاف انہوں نے سپریم کورٹ میں اپیل کی ہے۔ دہلی ہائی کورٹ نے ان کی عرضی کو یہ کہتے ہوئے مسترد کر دیا تھا کہ کارروائی پر روک لگانے کی کوئی ٹھوس وجہ نہیں ہے۔
انہوں نے اپنی درخواست میں دعویٰ کیا کہ انہیں غیر قانونی، محرک تحقیقات کے ذریعے ہراساں کیا جا رہا ہے جو کہ منصفانہ تفتیش کے ان کے حق کی خلاف ورزی ہے۔ اس کیس میں خود کو بے قصور بتاتے ہوئے انہوں نے اپنی اپیل میں کہا کہ نئی تحقیقات شروع کرنا قانونی عمل کا غلط استعمال ہے۔قبل ازیں، ہائی کورٹ نے سی بی آئی کو نوٹس جاری کیا تھا جس میں یادو کی مرکزی تفتیشی بیورو (سی بی آئی) کی ایف آئی آر کو منسوخ کرنے کی درخواست کی گئی تھی۔ ہائی کورٹ اس معاملے کی سماعت 12 اگست کو کرے گی۔
سی بی آئی نے 18 مئی 2022 کو ایک مقدمہ درج کیا تھا جس میں الزام لگایا گیا تھا کہ 2004 سے 2009 کے دوران یادو نے مبینہ طور پر اپنے (ریلوے) وزارتی عہدے کا غلط استعمال کرتے ہوئے ’گروپ ‘ڈی‘ ریلوے نوکریوں کے بدلے اپنے خاندان کے لیے زمین حاصل کی۔مرکزی تفتیشی ایجنسی نے الزام لگایا تھا کہ یہ تقرریاں بغیر کسی عوامی اشتہار کے کی گئی ہیں۔ تحقیقات سے پتہ چلا کہ ویسٹ سنٹرل ریلوے کے سینئر افسران نے یادو کی ہدایت پر ان تقرریوں میں سہولت فراہم کی۔
سی بی آئی نے دعویٰ کیا کہ یہ تقرریاں انڈین ریلوے میں بھرتی کے لیے قائم کردہ معیارات اور رہنما خطوط کے مطابق نہیں تھیں۔اہم بات یہ ہے کہ سی بی آئی نے ثبوت اکٹھے کرنے کے لیے دہلی اور بہار میں بھی کئی مقامات پر چھاپے مارے تھے۔سی بی آئی نے 7 جون کو مسٹر یادو، ان کے خاندان کے ارکان اور 38 ملازمت کے خواہشمندوں سمیت 77 دیگر کے خلاف تفصیلی چارج شیٹ داخل کی۔ عدالت نے اس سے قبل تحقیقات میں تاخیر پر تشویش کا اظہار کیا تھا اور سی بی آئی کو اپنی حتمی چارج شیٹ تیزی سے داخل کرنے کی ہدایت دی تھی۔عدالت نے گزشتہ سال سال اکتوبر میں مسٹر لالو یادو اور ان کے بیٹوں کو انفورسمنٹ ڈائریکٹوریٹ (ای ڈی) کے ذریعہ درج ایک متعلقہ کیس میں ضمانت دی تھی۔
مقدمے کی سماعت پر روک لگانے کا مطالبہ کرتے ہوئے، سابق وزیر اعلیٰ یادو نے کہا کہ ایف آئی آر2022 میں تقریباً 14 سال کی تاخیر کے ساتھ درج کی گئی تھی حالانکہ سی بی آئی کی ابتدائی انکوائری اور تفتیش کو مجاز عدالت میں کلوزر رپورٹ داخل کرنے کے بعد بند کر دیا گیا تھا۔
