سری نگر، 25 مئی (یو این آئی) پی ڈی پی صدر اور اننت ناگ – راجوری لوک سبھا سیٹ کی امید وار محبوبہ مفتی نے ہفتے کی صبح جنوبی کشمیر کے بجبہاڑہ میں احتجاجی دھرنا پارٹی ورکروں کی رہائی کے بعد ختم کر دیا اور بعد میں نزدیکی پولنگ مرکز اپنا ووٹ بھی ڈال دیا۔بتادیں کہ پی ڈی پی صدر نے ہفتے کی صبح بجبہاڑہ میں اس وقت احتجاجی دھرنا دیا جب اننت ناگ – راجوی سیٹ پر پولنگ کا عمل جاری تھا۔ان کا الزام تھا کہ ‘پولیس نے رات کو ان کی پارٹی کے پولنگ ایجنٹوں اور ورکروں کو گرفتار کرکے تھانوں میں بند کر دیا ہے’۔
محبوبہ مفتی نے دھرنا ختم کرکے ووٹ ڈالنے کے بعد میڈیا کو بتایا: ‘کل رات سے میری پارٹی کے ایجنٹوں اور کارکنوں کو گرفتار کرکے تھانوں میں بند کیا جا رہا ہے’۔انہوں نے کہا: ‘میں نے بجبہاڑہ میں دھرنہ دیا کہ میرے 6 ورکروں کو چھوڑ دیا جائے اب مجھے بتایا گیا کہ ان کو رہا کیا گیا ہے’۔
ان کا کہنا تھا: ‘میں لیفٹیننٹ گورنر سے کہنا چاہتی ہوں کہ آپ واجپائی جی کی پارٹی سے تعلق رکھتے ہیں جنہوں نے جموں و کشمیر کے لوگوں کا الیکشن میں بھروسہ بحال کیا تھا’۔انہوں نے کہا: ‘لیکن کل رات سے یہاں جو ماحول بنایا جا رہا ہے، پی ڈی پی کے ورکروں کی پکڑ دھکڑ جاری ہے،کہیں مشیںیں خراب ہیں تو کہیں پولنگ سسٹ کی جا رہی ہے اس کا مطلب ہے کہ یہاں 1987 کے الیکشن کو دہرانے کی کوشش کی جا رہی ہے’۔
دریں اثنا اننت ناگ پولیس نے ان الزامات کو رد کرکے کہا ہے کہ ‘انتہائی کم گرفتاریاں کی گئی ہیں اور گرفتار شدگان کا ماضی داغدار ہے’۔پولیس نے اپنے بیان میں کہا: ‘ایک سیاسی جماعت کی طرف سے ان کے ورکروں کو بند کرنے کا دعویٰ کیا گیا ہے’انہوں نے کہا: ‘پہلی بات یہ ہےکہ بہت کم گرفتاریاں کی گئی ہیں اور ان کو گرفتار کیا گیا ہے جن کا ماضی داغدار ہے نیز یہ گرفتاریاں ان معتبر ذرائع پر عمل میں لائی گئیں ہیں کہ جن کے مطابق الیکشن دن پر امن و قانون اور سیکورٹی کو خطرات لاحق تھے’۔ان کا کہنا تھا: ‘گرفتار شدگان میں سے بیشتر اوور گاؤنڈ ورکرس ہیں جن کو پُرامن الیکشن کے انعقاد کو یقینی بنانے کے لئے احتیاطی طور پر حراست میں لیا گیا ہے’۔
ادھر جموں وکشمیر کے چیف الیکٹورل افسر پی کے پولے نے میڈیا کو بتایا کہ پُر امن پولنگ کو یقینی بنانے کے لئے کچھ احتیاطی اقدام اٹھانا پڑتے ہیں۔انہوں نے کہا پولیس نے کچھ ایسے افراد کو حراست میں لیا ہے جن کا ماضی میں کوئی ریکارڈ رہا ہو۔ان کا کہنا تھا کہ اننت ناگ – راجوری لوک سبھا سیٹ کے لئے پر امن طریقے سے پولنگ ہو رہی ہے۔
موصوف سی ای او نے ہفتے کو جنوبی کشمیر کے ضلع اننت ناگ میں میڈیا کے ساتھ بات کرتے ہوئے کہا کہ اننت ناگ – راجوری لوک سبھا سیٹ کے لئے پر امن طریقے سے پولنگ ہو رہی ہے۔انہوں نے کہا: ‘پر امن طریقیے سے پولنگ کو یقینی بنانے کے لئے پولیس کو کچھ اقدام کرنا پڑتے ہیں’۔ان کا کہنا تھا: ‘اننت ناگ – راجوری لوک سبھا سیٹ ایسی سیٹ ہے جہاں الیکشن مہم کے دوران 80 فیصد پُر تشدد واقعے پیش آئے اور الیکشن مہم سے پہلے بھی یہاں دہشت گردی کے بھی کچھ واقعات پیش آئے’۔
مسٹر پولے نے کہا کہ خوشگوار پولنگ کے لئے کہیں کہیں کچھ اقدام کرنا پڑتے ہیں اور ایسے افراد جن کا ماضی کا کچھ ریکارڈ ہے یا جو او جی ڈبلیو ہیں، ان کو حراست میں لیا گیا ہے۔انہوں نے کہا” ‘تاہم ہماری کوشش رہتی ہے کہ گرفتاریاں کم سے کم ہوں اور ایسا کسی شخص کو حراست میں نہ لیا جائے جس کا ماضی کا کوئی ریکارڈ نہ ہو’۔ووٹوں کی گنتی کے بارے میں پوچھے جانے پر ان کا کہنا تھا کہ ووٹوں کی گنتی کے لئے گورنمنٹ ڈگری کالج اننت ناگ میں انتظامات کئے گئے ہیں جن کا میں نے بذات خود جائزہ لیا۔
