رائے بریلی:13مئی(یواین آئی) اترپردیش کے رائے بریلی پارلیمانی حلقے سے امیدوار راہل گاندھی نے پیر کو مرکز کی مودی حکومت کو ہدف تنقید بناتے ہوئے دعوی کیا کہ اس بار چار جون کو وزیر اعطم مودی تیسری بار اقتدار میں نہیں آئیں گے۔
یہاں ہر چند پور علاقے میں عوامی ریلیوں سے خطاب کرتےہوئے گاندھی نے کہا کہ رائے بریلی اور ان کے کنبے سے سیاسی تاریخ کا شاید سب سے پرانا رشتہ ہے اور ان کے پرداد جواہر لال نہرو کو سیاست کرنا رائے بریلی کے لوگوں نے ہی سکھایا ہے۔انہوں نے پارٹی کی اسکیمات پر زور دیتے ہوئے کہا کہ کانگریس جس طرح سے معیشت میں اصلاحات کرے گی اس سے میڈ ان انڈیا سامان میڈ ان چائنا کا مقابلہ کرے گا۔
آج رائے بریلی پارلیمانی حلقہ سے لوک سبھا امیدوار راہل گاندھی کے ساتھ پرینکا گاندھی نے رائے بریلی کے کئی علاقوں میں انتخابی ریلیوں سے خطاب کیا۔ ان کے ساتھ چھتیس گڑھ کے سابق وزیر اعلی بھوپیش بگھیل سمیت کئی کانگریسی رہنما شامل تھے۔
انتخابی ریلی سے خطاب کرتے ہوئے راہل نے کانگریس کے ذریعہ کئے گئے کاموں کو شمار کرایااور میڈیا پر طنز کیا کہ آج نریندر مودی کا چہرہ اور اڈانی امبانی کی شادیاں تو دکھائی جاتی ہیں لیکن اس ملک کی حقیقت نہیں دکھائی جاتی جس میں کئی مسائل ہیں۔
مودی حکومت کے لیے پیشین گوئی کرتے ہوئے انہوں نے کہا کہ وہ 4 جون کو تیسری بار مرکز میں حکومت نہیں بنا پائے گی۔
