ناگپور ( یو این آئی ) راشٹریہ سویم سیوک سنگھ کے سرسنگھ چالک ڈاکٹر موہن بھاگوت نے آبادی میں اضافے کی شرح (فرٹیلیٹی ریٹ) میں کمی پر تشویش کا اظہار کیا ہے۔ انہوں نے کہا کہ آبادی میں کمی کی شرح تشویشناک ہے۔ ڈیموگرافی کے قوانین کے مطابق آبادی میں اضافے کی شرح 2.1 سے کم نہیں ہونی چاہیے۔
اتوار کو ناگپور میں منعقد ایک پروگرام میں سنگھ کے سربراہ ڈاکٹر بھاگوت نے کہا کہ جدید آبادی سائنس کے مطابق جب کسی معاشرے کی آبادی میں اضافہ (فرٹیلیٹی ریٹ) 2.1 سے نیچے آجاتا ہے تو وہ معاشرہ دنیا سے معدوم ہو جاتا ہے۔ اگر اس معاشرے پر کوئی بحران نہ بھی آئے تو وہ معاشرہ معدوم ہو جاتا ہے۔ اس طرح کئی زبانیں اور کئی معاشرے تباہ ہو گئے۔
انہوں نے کہا کہ اس لیے آبادی میں اضافے کی شرح کو 2.1 سے نیچے نہیں جانا چاہیے۔ ہمارے ملک نے آبادی کی پالیسی 1998 یا 2002 میں تیار کی تھی۔ اس میں کہا گیا ہے کہ آبادی میں اضافے کی شرح 2.1 سے کم نہیں ہونی چاہیے۔ اگر ہم آبادی میں اضافے کی شرح 2.1 پر غور کریں تو ہمیں دو سے زیادہ بچوں کی ضرورت ہے۔ تین بچے ہونے چاہئیں۔ آبادی سائنس یہی کہتی ہے۔ بھاگوت نے کہا کہ تعداد سماج کی بقا کے لیے اہم ہے۔
