مسک نے ہندوستان کا دورہ منسوخ کردیا

واشنگٹن(یو این آئی) مشہور صنعت کار اور ٹیسلا کے چیف ایگزیکٹیو آفیسر (سی ای او) ایلون مسک نے اپنا ہندوستان کا دورہ ملتوی کر دیا ہے۔مسٹر مسک ہندوستان کے دورے کے دوران وزیر اعظم نریندر مودی سے ملاقات کرنے والے تھے اور جنوبی ایشیائی مارکیٹ میں کمپنی کے داخلے کے منصوبوں کی نقاب کشائی کرنے والے تھے۔ مسٹر مسک نے ٹیسلا کی ذمہ داریوں کا حوالہ دیتے ہوئے 22 اپریل کو طے شدہ ہندوستان کا دورہ منسوخ کر دیا ہے۔ انہوں نے جمعہ کی رات دیر گئے سوشل میڈیا پلیٹ فارم ایکس پر یہ اطلاع دی۔مسٹر مسک کے دورہ ہندوستان کو بہت اہم قرار دیا جا رہا تھا کیونکہ ان سے ہندوستان میں دو سے تین بلین ڈالر کی سرمایہ کاری کا اعلان متوقع تھا، جس کا بنیادی مقصد ملک کے اندر ٹیسلا کی فیکٹری لگانا تھا۔ اس سرمایہ کاری کے منصوبے کو حکومت ہند کی جانب سے درآمد شدہ گاڑیوں پر ڈیوٹی کم کرکے مقامی مینوفیکچرنگ کی حوصلہ افزائی کے لیے حالیہ پالیسی اقدامات سے مزید تقویت ملی۔
مسٹر مسک کا ہندوستان کا منصوبہ بند دورہ، ہندوستان میں عام انتخابات کے آغاز کے صرف دو دن بعد (19 اپریل کو ووٹنگ کا پہلا مرحلہ)، اس لیے بھی اہم سمجھا جاتا تھا کہ مسٹر مسک کی موجودگی وزیر اعظم نریندر مودی کی تیسری مدت کی پیشین گوئی کے موافق تھی۔ اس میں غیر ملکی سرمایہ کاری کو راغب کرنے اور پائیدار ترقی کو فروغ دینے کے لیے حکومت کی کوششوں کو اجاگر کرنے کی توقع تھی۔دھچکے کے باوجود، ٹیسلا کے شوقین اور ہندوستانی اسٹیک ہولڈرز مسٹر مسک کے مستقبل کے سفر اور دنیا کی سب سے تیزی سے بڑھتی ہوئی آٹوموبائل مارکیٹوں میں سے ایک میں ٹیسلا کی توسیع کے وعدے کے بارے میں پر امید ہیں۔