نواب ملک کو سپریم کورٹ سے راحت ملی

نئی دہلی(ایجنسیاں)سپریم کورٹ نے منی لانڈرنگ کیس میں مہاراشٹر حکومت کے سابق وزیر نواب ملک کی عبوری ضمانت کی مدت جمعرات کو ایک بار پھر بڑھا دی۔جمعرات کو اس کیس کی سماعت کے دوران انفورسمنٹ ڈائریکٹوریٹ کی جانب سے ایڈیشنل سالیسٹر جنرل ایس وی راجو نے سپریم کورٹ کو بتایا کہ انہیں نواب ملک کی ضمانت کی مدت میں توسیع کی درخواست پر کوئی اعتراض نہیں ہے۔
اس کے بعد جسٹس بیلا ایم ترویدی اور جسٹس پنکج متل کی بنچ نے جمعرات کو نواب ملک کی طبی ضمانت کی مدت میں چھ ماہ کی توسیع کا فیصلہ سنایا۔خبر رساں ایجنسی پی ٹی آئی کی رپورٹ کے مطابق اس معاملے میں گزشتہ سال 12 اکتوبر کو سپریم کورٹ نے نواب ملک کی ضمانت کی مدت میں تین ماہ کی توسیع کی تھی۔
درحقیقت اس معاملے میں بامبے ہائی کورٹ نے 13 جولائی 2023 کو اپنے فیصلے میں نواب ملک کو طبی بنیادوں پر ضمانت دینے سے انکار کر دیا تھا جس کے بعد انہوں نے سپریم کورٹ سے رجوع کیا تھا۔نواب ملک نے سپریم کورٹ کو بتایا کہ وہ گردوں کے مرض میں مبتلا ہیں اور گزشتہ سال 11 اگست کو دو ماہ کے لیے ضمانت ملنے کے بعد ان کی حالت بہتر نہیں ہو رہی۔
انفورسمنٹ ڈائریکٹوریٹ نے اسے فروری 2022 میں گرفتار کیا تھا۔ نواب ملک پر گینگسٹر داؤد ابراہیم اور اس کے ساتھیوں کی سرگرمیوں سے مبینہ طور پر منسلک ہونے کا الزام ہے۔