وزیراعلیٰ نے تعمیری کاموں کا جائزہ لیا
حیدرآباد: تلنگانہ سکریٹریٹ کی نئی عمارت کا افتتاح 30 اپریل کو ہوگا۔وزیراعلیٰ کے چندر شیکھر راؤ نے سکریٹریٹ کمپلیکس کے تعمیری کاموں کا جائزہ لینے کے بعد افتتاح کیلئے مہورت طئے کیا ہے۔ وزیراعلیٰ نے آج سکریٹریٹ کامپلکس کے علاوہ شہیدان تلنگانہ کی یادگار اور ڈاکٹر بی آر امبیڈکر کے مجسمہ کے تعمیری کاموں کا جائزہ لیا۔ بتایا جاتا ہے کہ 30 اپریل کو سکریٹریٹ کامپلکس کا افتتاح عمل میں آئے گا جبکہ 2 جون کو یوم تاسیس تلنگانہ کے موقع پر یادگار شہیدان تلنگانہ کی نقاب کشائی انجام دی جائے گی۔ سیاست نیوزکا اس حوالہ سے کہنا ہے کہ ڈاکٹر بی آر امبیڈکر کے طویل قامت مجسمہ کی نقاب کشائی 14 اپریل کو عمل میں آئے گی۔ واضح رہے کہ حکومت نے سکریٹریٹ کی قدیم عمارتوں کو منہدم کرتے ہوئے 617 کروڑ سے انتہائی عالیشان سکریٹریٹ کامپلکس تعمیر کیا ہے ۔ چیف منسٹر نے آج اختتامی مرحلہ کے کاموں کا جائزہ لیا۔ انہوں نے فرنیچر اور دیگر انفراسٹرکچر کی فراہمی کے بارے میں عہدیداروں کو ضروری ہدایت دی ۔ چیف منسٹر کو بتایا گیا کہ تعمیری کام آخری مراحل میں ہے اور طئے شدہ تاریخ تک تزئین نو کے کام مکمل کرلئے جائیں گے۔ چیف منسٹر کی سالگرہ کے موقع پر 17 فروری کو سکریٹریٹ کے افتتاح اور جلسہ عام کا منصوبہ بنایا گیا تھا لیکن ایم ایل سی نشستوں کے اعلامیہ کی اجرائی اور انتخابی ضابطہ اخلاق کے نفاذ کے سبب پروگرام کو ملتوی کرنا پڑا۔ چیف منسٹر نے سکریٹریٹ کی عمارت میں الیویشن کے کاموں ، فوارہ کی تنصیب ، گرین لان کی تعمیر اور دیگر سہولتوں کے بارے میں عہدیداروں سے معلومات حاصل کیں۔ انہوں نے عہدیداروں کے ساتھ تقریباً ہر فلور کا معائنہ کیا ۔ خاص طور پر چیف منسٹر آفس اور ریاستی وزراء کے دفاتر کا معائنہ کیا گیا ۔ سکریٹریٹ کے باب الداخلہ کی تعمیر کیلئے بھوپال سے ماہرین کو طلب کیا گیا ہے ۔ چیف منسٹر نے باب الداخلہ کی کمان کی خوبصورتی پر اطمینان کا اظہار کیا ۔ چیف منسٹر کے چیمبر میں فراہم کی جارہی سہولتوں ، ٹیبل ، کرسی اور دیگر فرنیچر کا چیف منسٹر نے جائزہ لیا ۔ انہوں نے واستو کے مطابق دروازوں کی تنصیب اور نشست کے انتظام کی ہدایت دی۔ کے سی آر نے اپنے چیمبر کے لئے اپنی پسند کے رنگ کی پینٹنگ کا مشورہ دیا۔ چیف منسٹر چیمبر میں کانفرنس روم کا جائزہ لینے کے بعد کے سی آر نے بعض تبدیلیوں کی ہدایت دی ۔ چیف سکریٹری اور اعلیٰ عہدیداروں کے چیمبرس اور مین کانفرنس ہال کا جائزہ لیا۔ چیف منسٹر نے کہا کہ ہر وزیر کے چیمبر کے قریب متعلقہ محکمہ کے عہدیداروں کے دفاتر قائم کئے جائیں۔ کے سی آر نے سکریٹریٹ کے اطراف کے علاقہ کا معائنہ کرکے سر سبز و شاداب کبنانے کی ہدایت دی۔ سکریٹریٹ سے چیف منسٹر ڈاکٹر بی آر امبیڈکر کے مجسمہ کی تعمیر کا جائزہ لینے پہنچے۔ ڈاکٹر امبیڈکر کا 125 فٹ طویل مجسمہ نصب کیا جائے گا۔ چیف منسٹر کے ہمراہ وزیر عمارات و شوارع پرشانت ریڈی ، وزیر سماجی بھلائی کے ایشور ، ارکان اسمبلی ڈی سمن ، جیون ریڈی ، چیف سکریٹری شانتی کماری ، آر اینڈ بی اور دیگر محکمہ جات کے عہدیداروں کے علاوہ کمشنر پولیس سی وی آنند موجود تھے۔ر
