دارالعلوم دیوبند کے صدرالمدرسین مولانا سید ارشد مدنی نے واضح کیا کہ چھپانے کیلئے کچھ بھی نہیں ہے
دیوبند( ہندوستان ایکسپریس ویب ڈیسک): یوگی حکومت کے ذریعہ غیر سرکاری مدارس کا سروے کرانے کے متعلق دارالعلوم دیوبند میں منعقد یوپی کے نمائندہ مدارس کے اجلاس کے دوران صدرالمدرسین مولانا سید ارشد مدنی نے ملک کی آزادی میں مدارس کے کردار پر روشنی ڈالی اور مدرسہ کے منتظمین کو کئی پہلوﺅں پر مکمل جانکاری دی۔ انہوں نے کہا کہ تمام مدارس میں ہائی اسکول تک عصری تعلیم کا لازمی انتظام کیا جائے۔قومی آواز ڈاٹ کام کی خبر کے مطابق مولانا ارشد مدنی نے کہا کہ مدارس ملک کے قانون کے تحت چلتے ہیں۔ انہوں نے کہا کہ مدارس اسلامیہ میں مالی حساب وکتاب میں بطور خاص شفافیت کا خیال رکھا جائے، اپنے طور سے سالانہ آڈٹ کرائیں، آئندہ سالوں میں رابطہ مدارس اسلامیہ عربیہ دارالعلوم دیوبند کے نمائندے بھی مختلف مواقع پر مربوط مدارس میں حساب وکتاب کا جائزہ لیے سکتے ہیں۔ مولانا ارشد مدنی نے کہا کہ زمین جائیداد کے کاغذات مستحکم رکھیں، اس سلسلہ میں بالکل بھی کوتاہی سے کام نہ لیں، حالیہ سروے سے ہر گزتشویش میں مبتلا نہ ہوں، بلکہ سروے ٹیم کے ساتھ اخلاق سے پیش آئیں اور مطلوبہ معلومات فراہم کرائیں۔ ملک کو جیسے عصری تعلیم یافتہ لوگوں کی ضرورت ہے بالکل اسی طرح ملت کو اچھے عالم ومفتی اچھے حافظ وقاری، اچھے امام وموذن اور اچھے دینی خدام کی بھی ضرورت ہے جو مدارس سے پوری ہوگی۔ اس لئے مدرسے اپنے نظام کے ساتھ چلتے رہیں گے۔ حدود شرع میں رہتے ہوئے جائز معاملات میں حکومت کا ہر ممکن تعاون کریں۔
اس پروگرام کے بعد بعد ازیں میڈیا سے گفتگو کرتے ہوئے جمعیة علماء ہند کے صدر مولانا سید ارشد مدنی نے صاف کیا کہ انہیں سروے سے کوئی دقت نہیں ہے، کیونکہ مدارس میں چھپانے کے لئے کچھ نہیں اور مدارس کے دروازے سب کے لئے ہمیشہ کھلے ہیں اس لئے سروے سے ڈرنے اور گھبرانے کی ضرورت نہیں ہے، انہوں نے کہا کہ مدارس کا جو نظام ہے وہ مکمل ہے اس لئے ہمیں مدارس کے لئے سرکار کی کسی امداد کی ضرورت نہیں ہے۔
آپ کویہ بھی بتادیں کہ یوگی حکومت کے ذریعہ غیر سرکاری مدارس کا سروے کرانے کے متعلق دارالعلوم دیوبند میں منعقد یوپی کے نمائندہ مدارس کے اجلاس میں دارالعلوم دیوبند نے سروے کے حوالہ سے اپنا موقف واضح کرتے ہوئے صاف لفظوں میں کہا کہ اہل مدارس کو سروے کی مخالفت نہیں بلکہ اس میں تعاون کرنا چاہئے، کیونکہ مدارس کے اندر کوئی بھی چھپی ہوئی چیز نہیں ہے، اہل مدارس کو چاہئے کہ وہ اپنا حساب کتاب اور دستاویزات کو شفاف رکھیں اور مدارس کی تاریخ سے اہل وطن کو واقف کرائیں۔ اجلاس میں شامل ہوئے سینکڑوں مدارس کے ذمہ داران نے بیک آواز مہتمم مفتی ابوالقاسم نعمانی اور صدرالمدرسین مولانا سید ارشد مدنی کے ذریعہ پیش کردہ اس اعلامیہ کی حمایت کی، اجلاس کے دوران مدارس کے طلبہ کے لئے عصری تعلیم کا نظم کرنے کی تجویز پیش کی گئی۔
