نئی دہلی (یو این آئی) دہلی کے وزیر اعلی اروند کیجریوال نے پیر کو کہا کہ دہلی کے لوگ آمریت کو برداشت نہیں کریں گے اور لیفٹیننٹ گورنر وی کے سکسینہ کو آئین اور سپریم کورٹ کے احکامات پر عمل کرنا ہوگا۔دہلی کے سرکاری اسکولوں کے اساتذہ کو ٹریننگ کے لیے فن لینڈ بھیجے جانے سے روکنے کے لیفٹیننٹ گورنر کے فیصلے کے خلاف آج مسٹر کیجریوال کی قیادت میں تمام وزراء اور ایم ایل ایز نے اسمبلی سے گورنر ہاؤس تک پیدل مارچ کیا۔ وزیر اعلیٰ اپنے وزراء اور ایم ایل ایز کے ساتھ تقریباً ایک گھنٹے تک لیفٹیننٹ گورنر سے ملنے کا انتظار کرتے رہے لیکن ان سے ملاقات نہیں ہوئی۔ اس دوران مسٹر کیجریوال نے کہا کہ دہلی کے لوگ آمریت کو برداشت نہیں کریں گے۔ دہلی جمہوریت سے چلے گی۔ لیفٹیننٹ گورنر کو آئین اور سپریم کورٹ کے احکامات کو ماننا ہوگا۔ دہلی کو آمریت نہیں، آئین اور جمہوریت چاہیے۔ عوام کے حقوق کے لیے ہماری جدوجہد جاری رہے گی۔
انہوں نے کہا کہ یہ افسوسناک ہے کہ لیفٹیننٹ گورنر نے وزیر اعلیٰ، نائب وزیر اعلیٰ اور تمام وزراء اور قانون سازوں سے ملنے سے انکار کر دیا۔دہلی اسمبلی کا تین روزہ اجلاس آج شروع ہوا لیکن ہنگامہ آرائی کے باعث اسپیکر نے اجلاس منگل تک ملتوی کردیا۔ اسمبلی کے اجلاس کے ملتوی ہونے کے بعد وزیر اعلیٰ کی قیادت میں تمام وزراء اور ایم ایل اے نے اسمبلی سے گورنر ہاؤس تک پیدل مارچ کیا۔ سب کے ہاتھوں میں پلے کارڈز تھے جن پر لکھا تھا کہ ‘ایل جی سر، اساتذہ کو فن لینڈ جانے دو’۔
وزیر اعلیٰ نے کہاکہ “سپریم کورٹ نے 4 جولائی 2018 کو کہا تھا کہ دہلی کے لیفٹیننٹ گورنر کو آزادانہ طور پر کوئی فیصلہ لینے کا اختیار نہیں ہے، پھر وہ اساتذہ کو ٹریننگ کے لیے فن لینڈ جانے سے کیوں روک رہے ہیں۔ اگر اس ملک کا کوئی لیفٹیننٹ گورنر یا گورنر یہ کہے کہ میں سپریم کورٹ کو نہیں مانتا تو اس ملک میں نہ جمہوریت بچے گی اور نہ ہی آئین۔
انہوں نے کہا کہ دہلی کے دو کروڑ عوام نے ووٹ دے کر اپنا وزیر اعلیٰ منتخب کیا ہے اور 70 میں سے 62 سیٹیں دی ہیں۔ اگر وہ وزیر اعلیٰ اپنے اساتذہ کو تربیت کے لیے فن لینڈ نہیں بھیج سکتا تو ایسے انتخابات اور جمہوریت کا کیا فائدہ۔
انہوں نے کہا کہ ان دنوں لیفٹیننٹ گورنر نے دہلی کے کئی کام روک رکھے ہیں۔ اس نے دہلی میں یوگا کلاس روک دی۔ افسران سے بات کرتے ہوئے لیفٹیننٹ گورنر نے تمام محلہ کلینک کی تمام ادائیگیاں روک دیں۔ ادویات، ٹیسٹ، ڈاکٹروں کی تنخواہ، محلہ کلینک کا کرایہ اور محلہ کلینک کا بجلی کا بل روک دیا گیا۔ اس بار انہوں نے دہلی جل بورڈ کی تمام ادائیگیاں روک دی گئیں۔
وہیں نائب وزیر اعلیٰ منیش سسودیا نے کہا کہ دہلی حکومت اساتذہ کو تربیت کے لیے فن لینڈ بھیجنا چاہتی ہے۔ حکومت پہلے ہی ایک ہزار سے زائد اساتذہ اور پرنسپل کو تربیت کے لیے بیرون ملک بھیج چکی ہے۔ اب لیفٹیننٹ گورنر کہہ رہے ہیں کہ ملک میں ہی کہیں ٹریننگ کروائیں۔ انہوں نے کہا کہ لیفٹیننٹ گورنر کو آئین میں کوئی اختیار نہیں ہے۔ سپریم کورٹ نے آئین کی تشریح کی ہے، واضح طور پر لکھا ہے کہ دہلی کی منتخب حکومت فیصلہ کرے گی۔
