پروفیسر نجمہ اختر نے جامعہ برادری کو رمضان کریم کی مبارک باد دی

نئی دہلی:پروفیسر نجمہ اختر (پدم شری)شیخ الجامعہ،جامعہ ملیہ اسلامیہ نے طلبا،اساتذہ اور یونیورسٹی کے غیر تدریسی عملے کو رمضان کریم کی مبارک باددی۔انھوں نے جامعہ برادری کے نام اپنے پیغام میں کہا کہ ’رمضان شریف کا مبارک مہینہ ہمیں صرف روحانی ترقی اور تقوی و زہد کے مواقع فراہم نہیں کرتا بلکہ ہمیں رجائیت،مثبت انداز نظرنظم و ضبط،اتحاد اور یگانگت سے بھری پری دنیا میں جذباتی اور ذہنی طورپر سالمیت کے ساتھ زندگی بسر کرنے کے لیے تیار کرتاہے۔
’(اس مبارک مہینے میں) ہم عبادت اور تشکر کے ساتھ مالک کائنات سے اور زمین والوں کے ساتھ رحم دلی اور دان پُن کا معاملہ کرکے اپنے رشتے مضبوط کرتے ہیں۔ انھوں نے مزید کہاکہ ماہِ مبارک ہماری قربت کے احساس کو تقویت بخشتا ہے،اس مہینے میں خدا کی رحمتوں اور برکتوں کو ساجھا کرتے ہیں،ضرورت مندوں اور محتاجوں کے لیے اپنا وقت،پیسہ اور توانائی صرف کرتے ہیں اور پوری انسانیت کی فلاح و بقا اور خوش حالی کے لیے رب کائنات سے دعا کرتے ہیں۔“
انھوں نے مزید کہا کہ روزہ رکھنے کا ایک پیغام یہ بھی ہے کہ عبادات کی ادائیگی ہرکوئی انتہائی خلوص اور اہتمام کے ساتھ کرتاہے اس کے ساتھ اپنے فرائض منصبی یعنی کلاس کا ہونا،بہترین تحقیقات، مرکوز مطالعات اور انتہائی فعالیت کے ساتھ چلنے والی ہم نصابی سرگرمیوں کی انجام دہی میں تن دہی اور خلوص کا مظاہرہ کرتا ہے۔یہ مہینہ ہمیں سکھلاتا ہے کہ ہم کیسے اپنی یونیورسٹی،سوسائٹی اور ملک کے ماحول کی تعمیر میں مدد بہم پہنچا سکتے ہیں اور جن مقاصد کے حصول کے لیے ہم کوششیں کرتے ہیں ان میں خاطر خواہ جوش،توانائی اور شادمانی کی لہر دوڑاسکتے ہیں۔یہ مناسب اور موزوں ترین وقت ہے اس بات کا کہ ہم چاق و چوبند راورآمادہ رہیں اور سبھی کی ترقی و خوش حالی کے لیے تعاون کے جذبے کو اپنی عادت بنائیں۔
شیخ الجامعہ نے اپنے پیغام میں مزید کہاکہ’انھی چیزوں کی وجہ سے جامعہ ملیہ اسلامیہ نے سخت بحران کے دورمیں ٹکنالوجی کی مدد سے چلنے والی علمی سرگرمیوں کے لیے نئے نئے طریقہ کار وضع کیے ہیں۔
شیخ الجامعہ نے تمام لوگوں سے اپیل کی کہ پابندی اور اخلاص کے ساتھ بھلائی اور خیر کے کام کرتے رہیں تاکہ اخلاقی اقدار،تفہیم اور امن کی بالادستی ہو۔خدا سے دعاہے کہ ہمارے نیک اعمال قبول فرمائے اور ہمارے سماجی،مذہبی،قومی اور دیگر ذمہ داریوں کو پوراکرنے کے لیے ہماری زندگی کو نئی امنگ اور جوش سے منور کردے۔