ممتازسعودی مبلغ عواد القرنی کو موت کی سزا کا سامنا

ریاض(ایجنسیاں) : سعودیہ میں پانچ سال سے قید ممتاز سعودی مبلغ اور مفکر عواد القرنی کو موت کی سزا کا سامنا ہے۔ 65 سالہ عواد القرنی کو ستمبر 2017 میں ولی عہد شہزادہ محمد بن سلمان سے اختلاف رائے پر گرفتار کیا گیا تھا۔پراسکیوٹر نے انہیں اخوان المسلمون کی حمایت کرنے کے الزام میں موت کی سزا کی سفارش کی ہے، لیکن روزنامہ نوائے اسلام کی خبر کے مطابق عدالت نے ابھی تک کوئی باضابطہ فیصلہ نہیں سنایا ہے۔القرنی کے خلاف لگائے گئے الزامات کی تفصیلات اب ان کے بیٹے ناصر نے گارڈین کے ساتھ شیئر کی ہیں، جو گزشتہ سال مملکت سے فرار ہو کر برطانیہ میں مقیم ہے، جہاں اس نے کہا ہے کہ وہ سیاسی پناہ حاصل کر رہے ہیں۔
65 سالہ عواد القرنی کے بارے میں کہا جاتا ہے کہ وہ ایک اہم اصلاح پسند دانشور ہیں جنہیں ٹویٹر پر 20 لاکھ صارفین فالوکرتے ہیں۔
الجزیرہ کی رپورٹ کے مطابق القرنی نے اسلامی فقہ اور مسئلہ فلسطین پر متعدد کتابیں لکھی ہیں۔ وہ نیورو لسانی پروگرامنگ میں ٹرینر بھی ہیں۔
القرنی نے 25 دیگر علماء کے ساتھ ایک بیان پر بھی دستخط کیے تھے جس میں عراق پر 2003 کے حملے کی مذمت کی تھی اور فلسطینیوں کے ساتھ اپنی یکجہتی کا اظہار بھی کیا تھا۔65 سالہ عالم دین میڈیا کے سامنے اپنی رائے ظاہر کرنے سے باز نہیں آئے اور 2012 میں سعودی عرب کی جانب سے دانشوروں کی گرفتاریوں اور سفری پابندیوں پر سخت تنقید کرتے رہے ہیں۔ دی گارڈین کے مطابق القرنی کے خلاف الزامات سے پتہ چلتا ہے کہ اس نے مختلف سوشل میڈیا پلیٹ فارمز جیسے ٹویٹر، فیس بک اور ٹیلی گرام کو مملکت کے خلاف "دشمن” خبریں پھیلانے کے لیے استعمال کیا ہے۔عدالتی دستاویزات سے یہ بھی پتہ چلتا ہے کہ انہوں نے اخوان المسلمون کی تعریف کرتے ہوئے واٹس ایپ گفتگو میں حصہ لینے کا "اعتراف” کیا۔
القرنی کے ناقدین نے اسے خطرناک مبلغ، سازشی نظریات پھیلانے اور جدیدیت کے خلاف انتہا پسندانہ بیان بازی کرنے والے کے طور پر پیش کیا ہے۔2017 میں اپنی گرفتاری کے بعد، القرنی کے بیٹے، ناصر القرنی نے گزشتہ سال اکتوبر میں مملکت چھوڑ دی تھی اور اب وہ برطانیہ میں مقیم ہیں اور اپنے والد کی رہائی کے لیے کوشاں ہیں۔