گجرات میں کجریوال کے ہندو مخالف ہونے کا پروپیگنڈہ شروع

نئی دہلی (یو این آئی) عام آدمی پارٹی کے رہنما اور دہلی کے وزیر اعلی اروند کیجریوال دہلی حکومت کے وزیر راجندر پال گوتم کے ہندو مخالف بیانات سے گھر گئے ہیں اور ان کے ہندو مخالف ہونے کا پروپیگنڈہ چاروں طرف سے زور پکڑتا جا رہا ہے۔
بھارتیہ جنتا پارٹی (بی جے پی) کے آئی ٹی ڈپارٹمنٹ کے انچارج امیت مالویہ نے ایک ویڈیو شیئر کیا ہے جس میں گجرات کے مختلف شہروں میں مسٹر کیجریوال کے کالے بیک گراونڈ والے پوسٹر اور کٹ آؤٹ لگائے گئے ہیں جن پر مسلم ٹوپی اور کندھے پر چار خانوں والا تولیہ ہے۔ مسٹر کیجریوال پر گجراتی میں لکھا ہے کہ ’’میں ہندو مذہب کو پاگل پن مانتا ہوں‘‘۔ اور "میں ہندو مذھب کے دیوتاؤں اور دیویوں برہما، وشنو، مہیش، شری رام، شری کرشن کو ایشور نہیں مانوں گا اور نہ ہی ان کی پوجا کروں گا۔”
بتایا جاتا ہے کہ اس سے گجرات میں مسٹر کیجریوال کی شبیہ کو نقصان پہنچا ہے اور آئندہ اسمبلی انتخابات میں ان کی پارٹی کے امکانات کو بھی نقصان پہنچ سکتا ہے۔درحقیقت، وجے دشمی کے دن یہ پروگرام مسٹر راجندر پال گوتم کی موجودگی میں دہلی کے قرول باغ میں امبیڈکر بھون میں ہوا تھا۔ ویڈیو میں بدھ مت کے پیروکار لوگوں سے حلف لے رہے ہیں۔ جس وقت یہ حلف لیا جا رہا تھا اس وقت اسٹیج پر راجندر پال گوتم بھی موجود تھے۔ جو حلف لیا گیا تھا اس میں برہما، وشنو، مہیش کو کبھی بھی ایشور نہیں مانوں گا اور نہ ہی ان کی پوجا کروں گا۔ میں رام اور کرشن کو ایشور نہیں مانوں گا اور نہ ہی ان کی پوجا کروں گا۔ میں گوری گنپتی وغیرہ ہندو مذہب کے کسی دیوی دیوتا کو نہیں مانوں گا اور نہ ہی پوجا کروں گا، شامل تھا۔
اس واقعہ کا ویڈیو بہت تیزی سے وائرل ہوا اور دہلی کے وزیر مسٹر گوتم بی جے پی کے نشانے پر آگئے۔ بی جے پی کے لیڈروں کی جانب سے ٹویٹ کرکے انہیں نشانہ بنایا گیا ہے۔ یہ بھی بتایا گیا ہے کہ مسٹر کیجریوال خود مسٹر گوتم کے بیانات سے ناراض ہیں۔