لکھنؤ:یکم جولائی(یواین آئی) سماج وادی پارٹی(ایس پی) کارکنان نے پیر کو پارٹی صدر و اترپردیش کے سابق وزیر اعلی اکھلیش یادو کا 51واں یوم پیدائش پورے جوش و خروش کے ساتھ منایا۔آج صبح سے ہی ایس پی کے ریاستی دفتر پر کارکنان اپنے لیڈر کو مبارک باد دینے کے لئے آنے لگے تھے۔ تمام لوگوں نے گلدستے، پودے اور دیگر یادگاریاں اکھلیش یادو کو نذر کر انہیں یوم پیدائش کی مبارک باد دی اور نیک تمناؤں سے نوازا۔
یادو کی یوم پیدائش پرملک و ریاست میں کئی مقامات پر کیک کاٹا گیا، شجر کاری کے ساتھ مٹھائی، پھل، غریبوں کو اناج، بھنڈارے وغیرہ کا انعقاد کیا گی۔ اسپتالوں میں مریضوں کو پھل تقسیم کئے گئے۔ یادو کی لمبی عمر کے لئے ہون۔پوجن کے پروگرام کئے گئے۔
سماج وادی خواجہ سرا سیل کی صدر پائل سنگھ نے اکھلیش یادو کی آرتی اتاری اور لمبی عمر کی دعا کی۔ اس موقع پر یادو نے شکریہ ادا کرتے ہوئے کہا کہ پی ڈی اے سب کو جوڑتا ہے۔ یہ آر ایس ایس کی لگنے والی شاکھاؤں کا جواب ہے۔ انہوں نے کہا کہ بی جےپی کی نفرتی سیاست کو روکنے کا کام سماج وادی پارٹی نے لوک سبھا الیکشن میں کیا ہے۔ سماج وادی پارٹی نے ملک کی تیسری سب سے بڑی پارٹی بن کر آنجہانی ملائم سنگھ یادو کا سپنا پور اکیا ہے۔
یادو نے کہا کہ اجودھیا میں ایس پی کی جیت بی جےپی کی تانا شاہی اور فرقہ واریت کی شکست ہے۔بی جےپی نے تین نئے قانون بنا کر شہری حقوق کی تلف کر کے آئین پر حملہ کیا ہے۔ جمہوریت میں یہ ناقابل قبول ہے۔سماج وادی پارٹی پی ڈی اے کی آئین اور جمہوریت بچانے کی یہ لڑائی ابھی جاری رہے گی۔
