غزہ کی تباہی پر خاموش امریکی اشرافیہ کو شرم آنی چاہیے: سابق سربراہ لیبر پارٹی

لندن (یو این آئی) برطانیہ کی حزب اختلاف لیبر پارٹی کے سابق سربراہ جیریمی کوربن نے کہا ہے کہ غزہ میں تباہی پر خاموش تماشائی بنی امریکی سیاسی اشرافیہ کو شرم آنی چاہیے۔قطری ٹی وی کو انٹرویو دیتے ہوئے جیریمی کوربن کا کہنا تھا کہ امریکی صدر جو بائیڈن اور امریکی سیاسی اسٹیبلشمنٹ کوشرم آنی چاہیے جو غزہ میں تباہی پر خاموش تماشائی بنی ہوئی ہے، ہم غزہ میں انسانی المیہ ہوتا ہوا دیکھ رہے ہیں۔برطانوی لیبر پارٹی کے سابق سربراہ نے اپنے سوشل میڈیا اکاؤنٹ سے ایک پوسٹ کرتے ہوئے کہا کہ انہوں نے برطانوی وزیر اعظم کو غزہ میں جنگ بندی اور معصوم شہریوں کے قتل عام کو رکوانے کیلئے ایک خط لکھا ہے۔اپنی پوسٹ میں جیریمی کوربن نے برطانوی وزیر اعظم کو لکھے ہوئے اپنے خط کی تصاویر بھی شیئر کی۔دوسری جانب لندن کے لیبر میئر صادق خان نے کہا کہ غزہ میں جو ہو رہا ہے وہ اسرائیلی حکومت کے اقدامات کا نتیجہ ہے۔ادھر اسکاٹش فرسٹ منسٹر نے جبالیہ پناہ گزین کیمپ پر اسرائیلی حملے کی مذمت کرتے ہوئے فوری جنگ بندی اور بڑے پیمانے پر امدادی کارروائیوں کا مطالبہ کیا ہے۔اسکاٹش فرسٹ منسٹر حمزہ یوسف نے اقوام متحدہ کی نمائندہ مارٹا لورینزو سے ملاقات کرتے ہوئے غزہ کیلئے انسانی امداد کے تحت مزید 2 لاکھ 50 ہزار یوروز دینے کا بھی اعلان کیا۔