’’ خواتین کےلئے تناؤ کے مسائل اور ان کا حل‘‘ کے موضوع پر خصوصی لیکچر

نئی دہلی(پریس رلیز)شعبۂ عربی، جامعہ ملیہ اسلامیہ کے طلبہ کی انجمن ’’ النادی العربی‘‘ کے زیر اہتمام عالمی یوم خواتین کی مناسبت سے ’’ خواتین کے لئے تناؤ کے مسائل اور ان کا حل‘‘ کے موضوع پر خصوصی لیکچر کا انعقاد پروفیسر عبدالماجد قاضی صدرشعبۂ عربی، جامعہ ملیہ اسلامیہ کی صدارت میں کیا گیا جس میں پروفیسر شیما علیم صدر شعبۂ نفسیات نے خطاب کیا، جس میں آپ نے انسان کی زندگی میں تناؤ کیسے پیدا ہوتا ہے اور اس کے کیا اسباب ہوتے ہیں نیز آپ نے مثبت اور منفی تناؤ پر روشنی ڈالی اور ان کے اثرات پر بھی گفتگو کی۔ آپ نے منفی تناؤ پر گفتگو کرتے ہوئے کہا کہ اس سے انسان کی زندگی میں برے اثرات مرتب ہوتے ہیں ۔ پروفیسر شیما نے اپنے خطاب میں خواتین کی زندگی میں منفی تناؤ کے اثرات کے بارے میں تفصیل سے روشنی ڈالی ۔آپ نے اپنے خطاب میں تناؤ دور کرنے کے طریقوں پر گفتگو کرتے ہوئے کہا کہ اسے جسمانی ورزش، اپنے اوپر اعتماد، اپنے پسندیدہ کام، باغ کی سیر اور اپنے جسم اور ذہن کو آرام دے کر ، مشکل حالات میں اپنے دوستوں اور اقرباء سے مشورہ طلب کرکے تناؤ کو کم کیا جاسکتا ہے۔آپ کے بعد صدر جلسہ پروفیسر عبدالماجد قاضی نے اپنے صدارتی خطاب میں سب سے پہلے شعبہ کی جانب سے پروفیسر شیما علیم کا اس مفید لیکچر کے لئے شکریہ ادا کیا اور کہا کہ ہم عالمی یوم خواتین کی مناسبت سے ہر سال پروگرام کا انعقاد کرتے ہیں، آپ نے قرآن اور حدیث کی روشنی میں خواتین کے مقام ومرتبہ پر گفتگو کی نیز عربی شاعری میں خواتین کے حصہ پر روشنی ڈالی۔ آپ نے خواتین کے مقام پر گفتگو کرتے ہوئے کہا کہ قرآن نے ماں کے مرتبہ کو جس اچھے پیرائے میں بیان کیا ہے اس سے دنیا کا ہر ادب اور زبان قاصر ہے۔
اس پروگرام کی نظامت ایم اے سال آخر کی طالبہ شیما جان نے کی، جبکہ بی اے سال اول کی طالبہ فاطمہ نے تلاوت کلام پاک سے پروگرام کا آغاز کیا، ماہین حمید نے پروفیسر شیما جان کا تعارف پیش کیا۔
پروگرام کے آخر میں تمام اساتذہ، مہمان خصوصی، ریسرچ اسکالرز اور طلبہ وطالبات کا شکریہ ادا کیا۔