نئی دہلی (یو این آئی) عام آدمی پارٹی (اے اے پی) نے بجٹ کو مایوس کن قرار دیتے ہوئے بدھ کو کہا کہ مرکزی حکومت نے اس بجٹ میں دہلی اور پنجاب کے ساتھ سوتیلا سلوک کیا ہے۔اے اے پی کی قومی تنظیم کے جنرل سکریٹری اور راجیہ سبھا کے رکن پارلیمنٹ سندیپ پاٹھک نے آج یہاں کہا کہ اس بار کا بجٹ بہت مایوس کن رہا ہے۔ اس بجٹ میں حکومت نے نہ تو روزگار پر توجہ دی ہے اور نہ ہی نوجوانوں اور کسانوں کے لیے کچھ کیا ہے۔ مرکزی حکومت نے اس بجٹ میں دہلی اور پنجاب کے ساتھ سوتیلا سلوک کیا ہے۔
ڈاکٹر پاٹھک نے کہا کہ آج حکومت کو جاگنے کی ضرورت ہے۔ اتنے عظیم ملک کے وزیر اعظم ہونے کے بعد اگر اتنے چھوٹے نظریے سے بجٹ بنائیں گے تو ملک کیسے ترقی کرے گا؟ حکومت کے اس بجٹ میں کوئی ہدف نہیں ہے۔ آج بے روزگاری کی شرح 7.2 سے بڑھ کر 9 فیصد ہو گئی ہے۔ کارپوریٹ منافع تو بڑح گیا ہے لیکن روزگار میں اضافہ نہیں ہوسکا ہے۔ کسانوں کو ایم ایس پی کی ضمانت دینا بھول جائیں، حکومت نے کھاد کی سبسڈی میں 36 فیصد کمی کر دی ہے۔ بھارتیہ جنتا پارٹی (بی جے پی) کی حکومت ملک کے کسانوں سے بہت نفرت کرتی ہے۔
اے اے پی لیڈر نے کہا کہ دہلی حکومت اپنے بجٹ میں 25 فیصد تعلیم پر خرچ کرتی ہے، جب کہ مرکزی حکومت دو فیصد سے بھی کم کا بجٹ تعلیم کے شعبے کو دیتی ہے۔ حکومت ملک کے نوجوانوں کو ناخواندہ رکھنا چاہتی ہے۔ جہاں دہلی حکومت اپنے بجٹ کا 15 فیصد صحت کے شعبے کو دیتی ہے، وہیں مرکزی حکومت اپنے بجٹ کا ایک فیصد سے بھی کم صحت کو دیتی ہے۔
