ٹکٹ نہ ملنے پرتلنگانہ کی بی جے پی لیڈررما دیوی مستعفی

حیدرآباد 23اکتوبر(یواین آئی)تلنگانہ بی جے پی نرمل کی ضلع صدررمادیوی پارٹی ٹکٹ نہ ملنے پر اشکبار ہوگئیں۔گذشتہ روز زعفرانی جماعت نے اپنے امیدواروں کی پہلی فہرست جاری کی تھی جس میں ان کو جگہ نہیں دی گئی جس پر رمادیوی نے پارٹی سے استعفیٰ دے دیا۔پارٹی نے راما راو پٹیل کو اس حلقہ سے امیدوار بنایا جس پر رمادیوی نے شدید مایوسی کا اظہار کیا اور وہ جذباتی ہوکرروپڑیں۔انہوں نے کہاکہ پارٹی نے ان کے ساتھ زیادتی کی ہے۔انہوں نے نشاندہی کرتے ہوئے کہاکہ بھینسہ اور مدھول میں انہوں نے پارٹی کو مستحکم کرنے کے کئے سرگرمی کے ساتھ خدمات انجام دی تھیں تاہم ان کو ہی ٹکٹ سے محروم کردیاگیا۔پارٹی نے ان کی خدمات کو تسلیم نہیں کیا ہے۔انہوں نے روتے ہوئے کہاکہ پارٹی نے ان سے ناانصافی کی ہے۔رمادیوی نے کہاکہ مستقبل کے لائحہ عمل کا وہ جلد اعلان کریں گی۔رمادیوی کا یہ ویڈیو سوشیل میڈیا کے مختلف پلیٹ فارمس پر تیزی کے ساتھ وائرل ہوگیا۔