شعبہ ہٰذا کے زیر اہتمام تقسیم انعامات کی تقریب کا انعقاد، 90 فیصد سے زائد نمبرات حاصل کرنے والے طلبہ انعامات سے سرفراز
مونگیر(پریس ریلیز)جامعہ رحمانی خانقاہ مونگیر کی مسجد میں حضرت امیر شریعت مولانا سید احمد ولی فیصل رحمانی صاحب زید مجدہ سجادہ نشیں خانقاہ رحمانی و سرپرست جامعہ رحمانی کے زیر صدارت ایک انعامی وتشجیعی پروگرام برائے طلبہ تخصص فی الافتاء منعقد ہوا۔ جس میں جامعہ رحمانی کے اساتذہ کرام اورطلبہ شریک ہوئے، پروگرام کی نظامت تخصص فی الافتاء کے طالب علم مولوی تنویر احمد رحمانی نے کی، جبکہ مولوی سعد انجم رحمانی متعلم تخصص فی الافتاء کی تلاوت قرآن پاک اور مولوی محمد انس رحمانی متعلم تخصص فی الافتاء نے بارگاہ رسالت مآب صلی اللہ علیہ وسلم میں نذرانۂ عقیدت پیش کرکے پروگرام کا آغاز کیا۔ اس کے بعد مولوی مرشد عالم رحمانی متعلم تخصص فی الافتاء نے جامعہ رحمانی کے شعبۂ تخصص فی الافتاء کے امتیازات وخصوصیات پر تفصیلی روشنی ڈالی۔ انھوں نے کہا کہ جامعہ رحمانی کا شعبہ تخصص فی الافتاء اپنی تعلیمی و تربیتی نظام کے اعتبار سے انفرادی شان کا حامل ہے، یہاں فن فقہ و فتاویٰ کے ماہر اساتذہ کرام ہمہ وقت طلبہ تخصص فی الافتاء کی معیاری تعلیم اور عمدہ تربیت کے لئے کوشاں رہتے ہیں۔
سرپرست جامعہ حضرت امیر شریعت مولانا سید احمد ولی فیصل رحمانی زید مجدہم ان طلبہ پر خصوصی شفقت و توجہ فرماتے ہیں، فقہ و فتاویٰ کے علاوہ حضرت سرپرست محترم نے ہم طلبہ کے لئے انگریزی اور کمپیوٹر کی تعلیم کا خصوصی انتظام فرما دیا ہے، مسائل کی تحقیق میں آسانی کے لئے شعبہ تخصص فی الافتاء کی درسگاہ میں کمپیوٹر اور انٹرنیٹ کی سہولتیں فراہم کی گئی ہیں ، تمرین فتاوی میں اساتذہ کرام معروف قسم کے سوالات کے بجائے ہر باب سے متعلق ایسے جدید اور معاصر مسائل سے ہم آہنگ سوالات دیتے ہیں جن سے متعلق جزئیات کتب فقہ میں بہت کم مل پاتے ہیں ، عام طور پر کتب فقہ میں موجود جزئیات کو بطور نظائر پیش کرکے جواب لکھنا پڑتا ہے ،یا کتب اصول میں مذکور کلیات سے مدد لینی پڑتی ہے، مزید برآں حضرات اساتذہ کرام کی طرف سے یہ تاکید رہتی ہے کہ ہر ایک جواب کم از کم تین عربی مصادر فقہیہ کے حوالے سے مزین ہو، جبکہ ہر روز ایک سوال اور جواب عربی زبان میں لکھنا ہوتا ہے، اور اس کے لئے حوالے بھی براہ راست نصوص سے دینے ہوتے ہیں ، اس کے بعد جامعہ رحمانی کے استاذ حدیث حضرت مولانا جمیل احمد صاحب مظاہری کا مختصر خطاب ہوا ، مولانا نے اپنے خطاب میں طلبہ کو جہد مسلسل اور سعی پیہم کی ترغیب دی، بعد ازاں شعبہ تخصص فی الافتاء کے ذمہ دار جناب مفتی جنید احمد قاسمی صاحب نے شعبہ سے متعلق عزائم و مقاصد بیان کئے ۔ تمام اساتذہ کرام کا شکریہ ادا کیا ۔
ششماہی امتحان میں معیاری نمبروں سے کامیاب ہونے والے طلبہ عزیز کو مبارک باد دی۔ مزید محنت اور مسلسل کوششوں کی تاکید کی اور تھکے بغیر سفر جاری رکھنے کے عزم کا اظہار کیا۔ انھوں نے مزید کہا کہ یہ شعبہ تمام اصحاب فقہ کی توجہات چاہتا ہے ۔ تاکہ مسلم قوم کے لئے جو ضروری فقہی مسائل ہیں ان پر بہتر سے بہتر کام کیا جا سکے۔ اس کے لیے اصحاب فن کو مدعو کرکے مختلف جدید اور پیچیدہ موضوعات پر محاضراتی نشستوں کا انعقاد بھی کیا گیا۔ اور فقہ و فتاویٰ پر گہری نظر رکھنے والے علماء کرام سے آن لائن بھی محاضرے کرائے گئے اور طلبہ نے ان محاضرات سے خوب فائدہ اٹھایا۔ انھوں نے طلبہ جامعہ رحمانی کو بالخصوص اور ہندوستان کے فضلاء مدارس کو بالعموم دعوت دی ہے کہ ان کے لیے شعبہ افتاء /جامعہ رحمانی کا دروازہ کھلا ہے۔ انھوں نے فقہی ذوق پیدا کرنے، فقہ سے متعلق صلاحیت کو پروان چڑھانے اور فقہ و فتاویٰ کے تعلق سے ہمہ جہت سرگرميوں میں حصہ دار بننے کے لیے یہاں داخلہ لینے کی فضلاء مدارس کو دعوت دی۔
جامعہ رحمانی کے شعبہ صحافت کے کنٹینٹ ایڈیٹر محمد شاہد رحمانی نے اپنے پریس بیانیہ میں بتایا کہ پورا پروگرام فکر و نظر آفیشئل یو ٹیوب چینل پر نشر کیا گیا ہے۔ جس سے بعد میں بھی استفادہ کیا جا سکتا ہے۔
اخیر میں حضرت سرپرست محترم دامت برکاتہم العالیہ کا نہایت ہی حوصلہ افزاء خطاب ہوا، حضرت نے شعبہ افتاء کے اساتذہ کو کامیابی کے ساتھ ایک سال مکمل کرنے پر مبارک باد پیش کی اور شعبہ ہذا کی مزید بلندی و ترقی کے لئے رہنماء نقوش بیان کئے۔ آپ نے طلبہ کو خطاب کرتے ہوئے فرمایا کہ آپ حضرات ہمیشہ اپنے لئے بلندترین اہداف طے کریں ، ان شاء اللہ اگر وہاں تک نہیں تو کم از کم اس کے قریب تک ضرور پہنچ جائیں گے، اس کے بعد ششماہی امتحان میں امتیازی نمبرات حاصل کرنے والے طلبہ کو گراں قدر انعامات سے نوازا گیا، جن ٢/طلبہ نے پنجانوے سے سنتانوے تک فیصدی اوسط حاصل کیا انھیں پانچ پانچ ہزار روپے نقد اور نوے سے لیکر چورانوے فیصدی اوسط حاصل کرنے والے ٩/ طلبہ کو پچیس پچیس سو روپے نقد انعام دیا گیا، بقیہ چند طلبہ جن کے اوسط نوے فیصد سے کم تھے انھیں انچارج شعبہ تخصص فی الافتاء حضرت مولانا مفتی جنید احمد صاحب قاسمی کی کتاب” مروجہ سودی معاملات :نقل و عقل کی روشنی میں” اور شعبہ صحافت جامعہ رحمانی کے ایچ او ڈی جناب فضل رحمٰں رحمانی صاحب کی انگریزی تصنیف دی شائننگ فیس آف اسلامک امہ: مولانا محمد ولی رحمانی دی گئی۔
سرپرست جامعہ حضرت مولانا احمد ولی فیصل رحمانی صاحب دامت برکاتہم کی دعاء پر پروگرام اختتام پذیر ہوا۔
