کراچی(ایجنسیاں):پاکستان کے سب سے بڑے شہر کراچی میں منگل کو ایک گھر سے تین بچیوں اور اُن کی والدہ کی لاشیں ملی ہیں جب کہ خاتون کے شوہر کو زخمی حالت میں اسپتال منتقل کر دیا گیا ہے۔قتل کی یہ واردات ملیر کے علاقے میں واقع شمسی سوسائٹی میں پیش آئی، جہاں پولیس کے مطابق فواد نامی ملزم نے اپنی اہلیہ اور تین بیٹیوں کو چھری کے وار کر کے ہلاک کر دیا جس کے بعد خود اپنی جان لینے کی کوشش کی۔ملزم فواد کو زخمی حالت میں اسپتال منتقل کردیا گیا ہے۔ پولیس نے جائے وقوع سے آلہ قتل برآمد کرکے واقعے کی تحقیقات کا آغاز کردیا ہے۔
پولیس کے مطابق قتل کیے جانے والوں میں ملزم فواد کی اہلیہ ہما اور تین بیٹیاں نیہا، فاطمہ اور سمرا شامل ہیں۔سینئرسپرنٹنڈنٹ پولیس (ایس ایس پی) کورنگی ساجد امیر سدوزئی کا کہنا ہے ابتدائی تحقیقات میں یہ بات سامنے آئی ہے کہ فواد کا اپنی اہلیہ سے جھگڑا معمول تھا۔ منگل کو فواد کی اہلیہ کی آواز گھر کی نچلی منزل میں موجود بھابھی نے سنی، جس کے بعد لوگ گھر کی کنڈی توڑ کر اندر داخل ہوئے۔پولیس نے قتل کیے گئے افراد کو نشہ آور چیز دیے جانے کا شبہہ ظاہر کیا ہے۔ ملزم فواد کے بارے میں پولیس کا کہنا ہے کہ وہ فیکٹری میں سیلز مینیجر تھا اور آج صبح کام پر گیا تھا اور وہاں سے واپسی پر اس نے یہ کارروائی کی۔
اس درمیان زخمی فواد نے پولیس کو دیے گئے اپنے ابتدائی بیان میں بتایا کہ میں پیسوں کی وجہ سے ڈپریشن میں تھا۔ ملزم نے بتایا کہ دوپہر کا کھانا کھانے کے بعد بیوی نے مجھ سے بدتمیزی کی، ہم دونوں کے لڑائی جھگڑے پر میری بڑی بیٹی رونے لگ گئی۔پولیس کو دیے گئے بیان میں فواد کا کہنا تھا کہ بیٹی نے کہا آپ لوگوں کےجھگڑے میں ہم پریشان ہوتے ہیں،اس کے بعد میری بیٹیاں سونے کےلیے لیٹ گئیں۔
ملزم نے مزید کہا کہ میں بیوی کو سمجھاتےسمجھاتے تھگ گیا تھا، میں پیسوں کی وجہ سے بھی ڈپریشن میں تھا۔اپنے اعترافی بیان میں فواد نے یہ بھی کہا کہ میں نے فیصلہ کیا کہ میں سب کو ختم کرکے خود کو بھی ختم کرلوں گا۔اس نے بتایا کہ بیوی واش روم میں گئی تو میں نے تینوں بیٹوں کو قتل کیا اور تصاویر اپنے انویسٹر کو بھیجیں اور لکھا میں نے اپنی فیملی کو ختم کردیا ہے۔
ملزم فواد نے بیان میں کہا کہ اس کے بعد انویسٹر کو لکھا کہ اب میں اپنی جان لینے لگا ہوں۔
