نوئیڈا(ہندوستان ایکسپریس نیوز بیورو): نوئیڈا کے سیکٹر 93 اے میں واقع ٹوئن ٹاورز اتوار کے روز زمیں دوز کر دیئے گے۔ عدالت عظمیٰ کے حکم پراس عمارت کو 3700 کلوگرام دھماکہ خیز مواد کی مدد سے صرف 9 سیکنڈ میں مہندم کیا گیا۔ جس کے زمیں دوز ہونے کے ساتھ ہی آسمان پر گردوغبار کے بادل چھا گئے اور عمارت ملبے میں تبدیل ہو گئی۔ رپورٹ کے مطابق مٹی کا یہ طوفان اگلے تین سے چار دنوں تک لوگوں کو پریشان کر سکتا ہے۔ دھماکہ کے ساتھ عین 2.30 بجے عمارت محض 9 سیکنڈ میں زمیں بوس ہو گئی۔ ٹوئن ٹاورز کے آس پاس رہنے والے لوگوں کو عمارت گرانے کے لیے دوسری سوسائٹی میں پناہ دی گئی تھی، سپر ٹیک کی ایمرالڈ سوسائٹی میں موجود تمام لوگوں سے گھروں کو خالی کرا لیا گیا تھا۔
انہدامی کارروائی کو دیکھنے کے لیے کافی لوگ جمع ہوئے اور بہت سے لوگ فاصلے پر موجود اپارٹمنٹ کے اوپر کھڑے ہو کر اس لمحے کو اپنے کیمروں میں قید کرتے دیکھے گئے۔ آپ کو بتادیں کہ 32 منزلہ اپیکس اور 29 منزلہ سائین ٹاور کو 3700 کلو گرام دھماکہ خیز مواد لگا کر گرایا گیا۔
سیکورٹی کے سبب ٹوئن ٹاورز کے قریب کسی کو جانے کی اجازت نہیں دی گئی۔ بتادیں کہ دھماکے کے بعد دھویں کے بادل اٹھ گئے اور پورے علاقے میں صرف دھواں ہی دکھائی دے رہا تھا۔ دونوں ٹاورز میں تقریباً 3700 کلو گرام دھماکہ خیز مواد ڈمپ کیا گیا تھا۔ نوئیڈا اتھارٹی کی سی ای او ریتو مہیشوری نے کہا کہ منصوبہ بندی کے مطابق انہدام کا عمل مکمل ہوا ۔ خالی سوسائٹیوں کے مکینوں کوآج شام 7 بجے کے قریب اپنے گھروں کو واپس جانے کی اجازت ہوگی۔ یہاں تقریباً 100 واٹر ٹینکرز اور 300 صفائی کارکن تعینات کیے گئے ہیں۔ گیس اور بجلی کی فراہمی بھی جلد بحال کر دی جائے گی۔ ذہن نشیں رہے کہ ٹوئن ٹاورز کو منہدم کرنے کے لیے آس پاس کے علاقوں میں این ڈی آر ایف کی ٹیمیں تعینات کی گئیں۔ اس کے علاوہ 560 پولیس اہلکار، ریزرو فورس کے 100 لوگ، 4 کوئیک رسپانس ٹیمیں بھی یہاں تعینات تھیں۔
دریں اثناء دہلی یونیورسٹی کے پروفیسر وپل سنگھ نے کہاہے کہ عمارت گرنے کے بعد دو طرح کی دھول ہوا میں اڑتی ہے۔ مٹی کے موٹے ذرات تو فوراً زمین پر گر جائیں گے لیکن چھوٹے ذرات کافی دیر تک ہوا میں موجود رہیں گے۔ دھول کے چھوٹے ذرات دو سے تین کلومیٹر کے علاقے میں اگلے تین سے چار روز تک موجود رہیں گے۔ اگر ہوا کی رفتار زیادہ رہی تو یہ ذرات اس سے کم وقت میں ہی دور ہو جائیں گے۔ اگر موقع پر بارش ہو گئی تو حالات بہت جلد معمول پر آ جائیں گے۔ لوگوں کو اس سے بچنے کے لیے ماسک پہننے کی ضرورت ہوگی، کیونکہ سیمنٹ کے چھوٹے ذرات جو نظر نہیں آتے انسانوں کو نقصان پہنچا سکتے ہیں اور بعد میں پھیپھڑوں میں جا کر مسائل پیدا کر سکتے ہیں۔
ان کا مزید کہنا تھا کہ انہدام کے بعد عمارت کے ملبے کو لے جانے میں بھی وقت لگے گا اور جب اسے ٹرکوں کے ذریعے لے جایا جائے گا تو یہ دیکھنا ہو گا کہ ٹرکوں کو صحیح طریقے سے ڈھانپا جا رہا ہے یا نہیں۔ اس عمارت کو گرانے میں 17 کروڑ روپے کا بوجھ بلڈر کو برداشت کرنا پڑے گا، جب کہ ملک میں عمارت مسمار کرنے کا ایسا پہلا واقعہ ہوگا جو تاریخ میں درج ہوا۔
یاد رہے کہ نوئیڈا کی کمپنی نے 2000 کی دہائی کے وسط میں ایمرالڈ کورٹ نامی پروجیکٹ شروع کیا تھا، جس کے تحت نوئیڈا اور گریٹر نوئیڈا ایکسپریس وے کے نزدیک اس پروجیکٹ کے تحت 3، 4 اور 5 بی ایچ کے فلیٹس والی عمارت تعمیر کرنے کا منصوبہ بنایا گیا۔ نیو اوکھلا انڈسٹریل ڈیولپمنٹ اتھارٹی (نوئیڈا) کی جانب سے اس پروجیکٹ کے لئے 14 ٹاورز کو منظوری فراہم کی تھی۔ تاہم دقت اس وقت شروع ہوئی جب اس کمپنی نے منصوبہ میں تبدیلی کرتے ہوئے سال 2012 تک احاطہ میں 14 کے بجائے 15 عمارتیں تعمیر کی گئیں۔ اس کے علاوہ منظوری 9 منزلہ ٹاورز کی دی گئی تھی جبکہ موقع پر 11 منزلہ ٹاورز تعمیر کئے گئے۔
اسی کے ساتھ اس پروجیکٹ کے علاوہ ایک اور منصوبہ شروع کر دیا تھا، جس میں مزید دو عمارت تعمیر ہونی تھیں، جنہیں 40 منزلہ بنانے کا منصوبہ تھا۔ ایسے میں کمپنی اور مقامی لوگوں کے درمیان قانون جنگ شروع ہو گئی۔ سپر ٹیک نے ٹاور ون کے سامنے گرین ایریا بنانے کا وعدہ کیا تھا۔ دسمبر 2006 تک عدالت میں پیش کئے گئے دستاویزات کے مطابق یہ اس منصوبہ میں شامل تھا جس میں پہلی بار جون 2005 میں ترمیم کی گئی۔
تاہم بعد میں گرین ایریا وہ زمین بن گیا جس پر سین اور اپیکس ٹوئن ٹاورز تعمیر کئے جانے تھے۔ اس پروجیکٹ میں تیسری ترمیم مارچ 2012 میں کی گئی۔ ایمرالڈ کورٹ اب ایک ایسا پروجیکٹ بن گیا جس میں 11 منزلوں کے 15 ٹاورز شامل تھے۔ ساتھ ہی سین اور اپیکس کی اونچائی 24 منزلوں سے 40 منزلوں تک بڑھا دی گئی۔ایمرالڈ کورٹ کے رہائشیوں نے غیر قانونی طور پر تعمیر کئے جا رہے ان ٹاوروں کو منہدم کرنے کا مطالبہ کیا۔ اس کے علاوہ نوئیڈا اتھارٹی سے ان کی تعمیر سے متعلق منظور کو منسوخ کرنے کا مطالبہ کیا۔
اس کے بعد مکینوں نے الہ آباد ہائی کورٹ میں اپیل کی جس پر عدالت نے اپریل 2014 میں ٹاورز کو منہدم کرنے کا حکم دیا۔ تاہم، سپرٹیک نے اس فیصلے کے خلاف اپیل کی اور معاملہ سپریم کورٹ پہنچ گیا۔سپریم کورٹ آف انڈیا نے 2021 میں نوئیڈا ٹوئن ٹاورز کو منہدم کرنے کا حکم دیتے ہوئے کہا کہ ٹاورز غیر قانونی طور پر بنائے گئے تھے۔ اس کے بعد سپرٹیک نے سپریم کورٹ سے اپنے حکم پر نظرثانی کی اپیل کی۔سپریم کورٹ میں اس کیس سے متعلق کئی سماعتیں ہوئیں۔ سماعت میں ایمرالڈ کورٹ کے رہائشیوں کے تحفظ کے بارے میں خدشات بھی شامل تھے۔ تاہم عدالت نے اپنا فیصلہ تبدیل نہیں کیا۔اب آج ان دونوں عمارتوں کو گرا دیا جائے گا۔ دہلی کے قطب مینار سے 100 میٹر اونچی ان عمارتوں کو گرانے کے لیے 3700 کلو گرام سے زیادہ دھماکہ خیز مواد استعمال کیا جائے گا۔ ان دونوں عمارتوں کی تعمیر میں تقریبا 800 کروڑ رپے خرچ ہوئے تھے اور اب اس کو گرانے میں تقریبا 18.55 کروڑ روپئے خرچ ہوں گے۔ جس کا خرچ ٹاورز کی تعمیر کرنے والی کمپنی کو ہی برداشت کرنا پڑے گا۔سپرٹیک عمارت کی اونچائی تاریخی عمارت قطب مینار سے بھی زیادہ ہے۔ اس کو بنانے میں کئی سال لگ گئے اور اب گرانے میں محض کچھ سیکنڈ ہی لگنے ہیں۔ ماہرین کی مدد کر رہے برطانوی انجینئر نے بتایا ہے کہ جب عمارت کو گرایا جائے گا تو اس سے اٹھنے والی دھول آسمان میں غبار کی شکل میں تقریبا 300 میٹر تک پھیل جائے گی اور اسی دوران ارد گرد کے علاقوں میں موجود عمارتوں میں بھی اس کی دھمک محسوس کی جائے گی۔
