چاہے ہندو ہو یا مسلمان رام ہر کسی کے ہیں :فاروق عبداللہ

جموں،21دسمبر(یو این آئی)جموں وکشمیر نیشنل کانفرنس کے صدرڈاکٹر فاروق عبداللہ نے جمعرات کے روز کہاکہ خوش ہیں کہ رام مندر کھلنے والا ہے ۔انہوں نے کہاکہ رام سبھی کے ہیں چاہئے ہندو ہویامسلم ، سکھ ہو یاعیسائی ۔ان کا مزید کہنا تھا کہ جموں وکشمیر میں دہشت گردی کے واقعات ابھی بھی رونما ہو رہے ہیں۔ان باتوں کا اظہار موصوف نے کٹھوعہ میں نامہ نگاروں سے بات چیت کے دوران کیا۔
فاروق عبداللہ نے کہاکہ سپریم کورٹ نے دفعہ 370کی منسوخی کو چیلنج کرنے والی عرضیوں پر تو فیصلہ سنایا لیکن انہیں کم سے کم سٹیٹ ہڈ کی بحالی اور جلدازجلد الیکشن کرانے کے حوالے سے بھی کچھ کہنا چاہئے تھا۔اپوزیشن پارٹیوں کی جانب سے ایوان میں خلل ڈالنے کے بارے میں پوچھے گئے سوال کے جواب میں فاروق عبداللہ نے کہاکہ حکومت بہت سے اہم بلوں کو بغیر کسی بحث کے ہی پاس کرنا چاہتی ہے۔فاروق عبداللہ نے کہاکہ موجودہ حکومت کا خیال ہے کہ وہ ہمیشہ اقتدار کی کرسی پر براجمان رہے گی ایسا نہیں کیونکہ انگریزوں کو بھی ڈھائی سو سال کے بعد بھارت سے جاناپڑا تھا اور اس وقت صرف انڈین نیشنل کانگریس نے انگریزوں کے خلاف جدوجہد کی تھی۔
این سی صدر نے بتایا کہ خوش ہیں کہ رام مندر کھلنے والا ہے لیکن مجھے دعوت نامہ نہیں ملا ۔انہوں نے کہاکہ رام پوری دنیا کا ہے اس میں مسلمان ، ہندو، سکھ ، عیسائی اور دیگر مذاہب کے لوگ شامل ہیں۔جموں وکشمیر کی موجودہ صورتحال کے بارے میں پوچھے گئے ایک اورسوال کے جواب میں فاروق عبداللہ نے کہاکہ یونین ٹریٹری میں مسلسل دہشت گردی کے واقعات رونما ہو رہے ہیں اور حکومت سب کچھ ٹھیک ہونے کا دعویٰ کررہی ہے۔