نئی دہلی، 04 جنوری (یو این آئی) عام آدمی پارٹی (آپ) کے قومی کنوینر اروند کیجریوال نے کہا ہے کہ اگر ہماری حکومت بنتی ہے تو جن لوگوں کے پانی کے غلط بل آئے ہیں، ان کے تمام بل معاف کر دیے جائیں گے۔مسٹر کیجریوال نے آج ایک پریس کانفرنس میں کہا کہ دہلی میں ہماری حکومت پچھلے 10 برسوں سے لوگوں کو مفت پانی فراہم کر رہی ہے۔ ہر ماہ 20-20 ہزار لیٹر پانی ہر خاندان کو مفت دیا جاتا ہے۔ دہلی میں 12 لاکھ سے زیادہ خاندانوں کے پاس صفر بل ہیں، لیکن مجھے نہیں معلوم کہ مجھے جیل بھیجنے کے بعد ایسا کیا ہوا کہ لوگوں کو ہر ماہ ہزاروں اور لاکھوں روپے کے بل آنے لگے۔ لوگ اپنے پانی کے بلوں سے پریشان ہیں۔
سابق وزیراعلی نے کہا کہ ہم یہ برداشت نہیں کر سکتے کہ دہلی کے لوگ کسی بات پر غمزدہ اور پریشان ہوں۔ کئی فورمز سے اعلان کر چکے ہیں لیکن آج میں عوامی اور باضابطہ طور پر اعلان کرتا ہوں کہ جن لوگوں کو لگتا ہے کہ ان کے ہزاروں لاکھوں روپے کے بل غلط ہیں تو انہیں اپنے پانی کے بل ادا کرنے کی ضرورت نہیں ہے ۔ الیکشن کے بعد آپ کی حکومت بنے گی، ہم ان کے غلط بل معاف کر دیں گے۔ یہ میرا سب سے وعدہ ہے۔
