آن لائن قرعہ اندازی کے ذریعے 1330مرداور1210 خواتین کاانتخاب
نئی دہلی:دہلی سے حج بیت اللہ 2023کے لئے درخواست گذار4110 عازمین حج میں سے آن لائن قرعہ اندازی کے ذریعے 2540عازمین حج منتخب کیے گئے ہیںجن میں مردعازمین کی تعداد1330جبکہ خواتین عازمین کی تعداد1210 ہے ۔ منتخب ہونے والے ان خوش نصیب افراد میں 51بغیر محرم خواتین اور 210ستر سال اور اس سے زائد عمر کے عازمین مع ایک ساتھی کے شامل ہیں۔ جبکہ 1570درخواست گذار ویٹنگ لسٹ میں رکھے گئے ہیں۔ دہلی اسٹیٹ حج کمیٹی کی چیرپرسن محترمہ کوثر جہاں ، ممبران حج کمیٹی جناب گوتم گمبھیر(ایم پی)، محترمہ نازیہ دانش(کونسلر) اور جناب محمد سعد نے اس موقع پر اپنی خوشی کا اظہار کرتے ہوئے قرعہ میں منتخب ہونے والے تمام عازمین حج کو مبارکباد پیش کی۔حج کمیٹی کے ایگزیکیٹو آفیسر اشفاق احمد عارفی کی جانب سے فراہم اطلاع کے مطابق منتخب عازمین کی فہرست دہلی اسٹیٹ حج کمیٹی کے دفتر میںچسپاں کر دی گئی ہے اور انہیں ان کے رجسٹرڈ موبائل نمبر پر بھی مطلع کیا جا رہا ہے۔اس درمیان دہلی اسٹیٹ حج کمیٹی منتخب عازمین کے ضروری اور مطلوبہ دستاویزات کی وصولی اور تکمیل کے لئے کارروائی کا عمل تیز کرتے ہوئے عازمین حج سے مسلسل رابطہ میں رہے گی اور ان کی رہنمائی اور معلومات کی فراہی کے لئے خصوصی انتظامات کو یقینی بنائے گی۔ ماہ رمضان المبارک کے فوراً بعد عازمین کی تربیت کا سلسلہ بھی شروع کیا جائے گا اور اس کے لئے دہلی اسٹیٹ حج کمیٹی دہلی کے مختلف علاقوں میں اپنے ماہرین اور تجربہ کار تربیت دہندگان کے ذریعہ کئی مرحلے میں عازمین کی تربیت کے لئے تربیتی کیمپ کا انعقاد کرے گی۔واضح ہوکہ محکمہ اقلیتی امور اور حج کمیٹی آف انڈیا کی جانب سے جاری حج کلینڈر کے مطابق اس سال حج بیت اللہ کے لئے حج فلائٹس کا سلسلہ 21مئی سے شروع ہونے کا امکان ہے۔
دہلی اسٹیٹ حج کمیٹی کی چیئرپرسن محترمہ کوثر جہاں نے منتخب عازمین حج سے درخواست کی ہے کہ حج کمیٹی آف انڈیا کی طرف سے مقرر کردہ پیشگی رقمRs.81,800/- بینک میں جمع کرانے کے بعد اس کی رسید ، اصل پاسپورٹ، سفید بیگ گراونڈ والی ایک فوٹواور میڈیکل سرٹیفکٹ اور دیگر کاغذات دہلی اسٹیٹ حج کمیٹی میں 07-04-2023 تک جمع کرادیں۔ یاد رہے کہ اس بار میڈیکل سرٹیفکٹ وزارت صحت و خاندانی بہبود ،حکومت ہند کی جانب سے جاری کئے گئے پروفارماپر ہی لیا جائے گا، جوکہ صرف سرکاری ڈاکٹر (الوپیتھک) سے تصدیق شدہ ہونا لازمی ہے۔ مذکورہ میڈیکل سرٹیفکٹ کا پروفارما حج کمیٹی آف انڈیا کی ویب سائٹ:https://hajcommittee.gov.inسے ڈاون لوڈ کیا جا سکتا ہے یا دہلی اسٹیٹ حج کمیٹی کے دفتر سے بھی حاصل کیا جاسکتا ہے۔
