عباس انصاری کی پیشگی ضمانت عرضی الہ آباد ہائی کورٹ سے خارج

نئی دہلی(ایجنسیاں): الٰہ آباد ہائی کورٹ کی لکھنؤ بنچ نے پیر کے روز غیر قانونی اسلحہ معاملے میں زور آور لیڈر مختار انصاری کے رکن اسمبلی بیٹے کی پیشگی ضمانت عرضی کو خارج کر دیا ہے۔ قومی آواز ڈاٹ کام کی خبر کے مطابق اس کیس میں عباس انصاری کی طرف سے عرضی داخل کی گئی تھی۔ جسٹس دنیش کمار سنگھ کی سنگل بنچ نے معاملے کی سماعت کرتے ہوئے پیشگی ضمانت عرضی کو خارج کرنے کا فیصلہ سنایا۔ حال ہی میں ایک اسپیشل کورٹ نے پولیس کی عرضی پر مئو سے رکن اسمبلی عباس انصاری کو بھگوڑا قرار دے دیا تھا۔ عباس انصاری کے والد مختار انصاری بھی زور آور لیڈر ہیں۔
عباس انصاری اسلحہ لائسنس کے غلط استعمال سے جڑے ایک معاملے میں مطلوب ہیں۔ عباس انصاری کی تلاشی میں لکھنؤ پولیس نے یوپی میں کئی ٹھکانوں پر چھاپہ ماری کرنے کے ساتھ ہی پنجاب اور راجستھان میں بھی چھاپہ ماری کی، لیکن کامیابی ہاتھ نہیں لگی۔ ایم پی/ایم ایل اے کی خصوصی عدالت نے 14 جولائی کو عباس انصاری کے خلاف غیر ضمانتی وارنٹ جاری کیا تھا۔
عباس انصاری پر لکھنؤ پولیس کو بغیر بتائے اسلحہ لائسنس نئی دہلی منتقل کرنے کا الزام ہے۔ اسی سلسلے میں عدالت نے وارنٹ جاری کیا تھا۔ ان پر ایک لائسنس پر دھوکہ سے کئی اسلحہ لینے کا بھی الزام ہے۔ عباس انصاری کے خلاف لکھنؤ پولیس نے 12 اکتوبر 2019 کو اسلحہ لائسنس کو لے کر ایک معاملہ درج کیا تھا۔ اس کی جانچ کے بعد پولیس نے دفعہ 467، 468، 471، 420 اور آرمس ایکٹ کی دفعہ 30 کے تحت عدالت میں فرد جرم داخل کیا تھا۔