اڈانی گروپ بہار میں 8700 کروڑ روپے کی سرمایہ کاری کرے گا

پٹنہ (یواین آئی) ملک کا معروف صنعتی گروپ اڈانی گروپ بہار میں 8700 کروڑ روپے کی سرمایہ کاری کرنے کی تیاری کر رہا ہے۔اڈانی انٹرپرائزز کے ڈائریکٹر پرنب اڈانی نے جمعرات کو ‘بہار بزنس کنیکٹ-2023’ کانفرنس میں اپنے خطاب میں کہا کہ اڈانی گروپ بہار لاجسٹک، گیس کی تقسیم اور زرعی لاجسٹکس کے شعبے میں موجود ہے۔ اس میں تقریباً 850 کروڑ روپے کی سرمایہ کاری کی گئی ہے اور تقریباً تین ہزار روزگار کے مواقع پیدا ہو سکتے ہیں۔ یہی نہیں گروپ بہار میں سرمایہ کاری کو 10 گنا بڑھا کر 8700 کروڑ روپے کرنے کی تیاری کر رہا ہے۔ اس کے علاوہ تین اضافی شعبوں میں سرمایہ کاری ہوگی اور اس سے 10 ہزار بالواسطہ روزگار کے مواقع پیدا ہوں گے۔
مسٹر اڈانی نے کہا کہ گروپ گودام کی جگہ کو ایک لاکھ مربع فٹ سے 65 لاکھ مربع فٹ تک بڑھانے کے لیے 1,200 کروڑ روپے کی سرمایہ کاری کرے گا۔ پٹنہ میں دو بڑے گودام ہوں گے اور اس سے 2000 لوگوں کو روزگار کے مواقع ملیں گے۔ اس کے علاوہ پورنیا، بیگوسرائے، دربھنگہ، سمستی پور، کشن گنج اور ارریہ چھ مقامات پر اس کی ذخیرہ کرنے کی صلاحیت کو 1 لاکھ 50 ہزار میٹرک ٹن سے بڑھا کر 2 لاکھ 75 ہزار میٹرک ٹن کرنے کے لیے ایگری لاجسٹکس میں 900 کروڑ روپے کی سرمایہ کاری کی گئی ہے۔ اس سے دو ہزار افراد کو روزگار بھی ملے گا۔
ڈائریکٹر نے کہا کہ گیا اور نالندہ میں اپنے موجودہ سٹی گیس ڈسٹری بیوشن نیٹ ورک کو بڑھانے کے لیے 200 کروڑ روپے کی سرمایہ کاری کی جائے گی۔ یہ گروپ ایک نیا کمپریسڈ بائیو گیس پلانٹ اور الیکٹرک وہیکل (ای وی) چارجنگ سینٹر بھی بنائے گا اور 1500 افراد کو روزگار فراہم کرے گا۔ انہوں نے کہا کہ اڈانی ولمار کو بھی بہار لایا جا رہا ہے۔ ابتدائی مرحلے میں آٹا مل پلانٹ، آر ایف ایم پلانٹ، سالوینٹ ایکسٹرکشن پلانٹ، کو-جن پاور پلانٹ کے ساتھ ساتھ سہسرام ​​اور روہتاس میں دھان کی پروسیسنگ پلانٹس کی تعمیر کے لیے 800 کروڑ روپے کی سرمایہ کاری کی جائے گی۔ یہ پلانٹ 200 افراد کو روزگار فراہم کرے گا۔