نینی تال، یکم جولائی (یو این آئی) محکمہ موسمیات کی طرف سے جاری وارننگ کے پیش نظر پہاڑی علاقوں میں انتظامیہ الرٹ موڈ میں آگئی ہے۔باگیشور ضلع میں منگل کو اسکولوں میں چھٹی کا اعلان کردیا گیا ہے، جب کہ چمپاوت میں انتظامیہ کو الرٹ موڈ میں رہنے کی ہدایت دی گئی ہے۔باگیشور ضلع مجسٹریٹ انورادھا پال کی طرف سے جاری کردہ خط میں کہا گیا ہے کہ محکمہ موسمیات کی طرف سے پہاڑی علاقوں میں 2 جولائی سے 4 جولائی تک بھاری سے بہت بھاری بارش کی پیش گوئی کی گئی ہے۔
اس لئے سیکورٹی کے پیش نظر انہوں نے ضلع کے آنگن واڑی مراکز کے ساتھ ساتھ کلاس 1 سے 12 تک کے تمام سرکاری، غیر سرکاری اور پرائیویٹ اسکولوں کو بند رکھنے کی ہدایات دیں۔ خلاف ورزی کی صورت میں انہوں نے کارروائی کا انتباہ جاری کیا ہے۔چمپاوت میں بھی انتظامیہ کو الرٹ موڈ پر رکھا گیا ہے۔ ڈسٹرکٹ مجسٹریٹ نونیت پانڈے کی جانب سے آئی آر ایس سسٹم میں نامزد تمام افسران کو ہائی الرٹ پر رہنے کی ہدایات دی گئی ہیں۔ اس کے علاوہ ضلع میں افسران اور ملازمین کے چھٹی لینے اور ہیڈ کوارٹر سے باہر جانے پر پابندی عائد کر دی گئی ہے۔
ضلع مجسٹریٹ نے نیشنل ہائی ویز، محکمہ تعمیرات عامہ اور پردھان منتری گرامین سڑک یوجنا کے عہدیداروں کو چوکس رہنے کی ہدایت دی ہے اور ایمرجنسی کی صورت میں موٹرسڑکوں کو بروقت کھولنے کی ہدایت دی ہے۔اس کے ساتھ ہی تحصیلدار، پٹواری اور تھانہ انچارجوں کو بھی سامان کے ساتھ اپنے مراکز پر رہنے کی ہدایات دی گئی ہیں۔ انہوں نے عہدیداروں سے ٹنک پور اور بنباسہ علاقوں میں پانی جمع ہونے کی صورتحال سے نمٹنے کو بھی کہا ہے۔
