بنگلہ دیش میں عام انتخابات کے انعقاد کا اعلان

ڈھاکہ (یو این آئی) بنگلہ دیش کے الیکشن کمشنر محمد انیس الرحمان نے ہفتہ کے روز کہا کہ ملک میں آئندہ عام انتخابات جنوری 2024 کے پہلے ہفتے میں ہوں گے۔الیکشن کمشنر انیس الرحمان نے کہا کہ ہم نے ابھی پولنگ کی تاریخ کا فیصلہ نہیں کیا۔ انہوں نے یہ بات دارالحکومت ڈھاکہ کے اگرگاؤں میں الیکٹورل ٹریننگ انسٹی ٹیوٹ (ای ٹی آئی) میں 12ویں پارلیمانی انتخابات کے ٹرینرز کے تربیتی پروگرام میں کہی۔قبل ازیں چیف الیکشن کمشنر قاضی حبیب اول نے اس تربیتی پروگرام کا افتتاح کیا جو 30 نومبر تک جاری رہے گا۔ اس دوران دیگر افسران کے علاوہ چار الیکشن کمشنرز اور الیکشن کمیشن کے سکریٹری بھی موجود تھے۔سی ای سی نے کہا کہ انتخابات کو منصفانہ طور پر انجام دینے کے لیے قانون میں پریزائیڈنگ افسران کے اختیارات میں اضافہ کیا گیا ہے، انہوں نے کہا کہ ووٹنگ کو قابل اعتماد بنانے کے لیے نہ صرف منصفانہ ہونا چاہیے بلکہ اس میں عوامی حصہ داری بھی ہونی چاہیے۔