مدینہ منورہ (یو این آئی) سعودی عرب میں مسجد نبوی صلی اللہ علیہ وآلہ وسلم کی انتظامیہ نے کہا ہے کہ گزشتہ ایک ہفتے کے مسجد نبویؐ میں 54 لاکھ 28 ہزار 718 نمازی اور زائرین کی آمد ہوئی۔سعودی خبررساں ادارے ’ایس پی اے‘ کی رپورٹ میں بتایا گیا ہے کہ مسجد نبوی صلی اللہ علیہ وآلہ وسلم کے امور کی جنرل اتھارٹی نے گزشتہ ایک ہفتے کے دوران مسجد میں آنے والوں نمازیوں اور زائرین کو فراہم کی جانے والی خدمات کے اعدادوشمار جاری کیے ہیں۔
اتھارٹی نے بتایا کہ 5 لاکھ 5 ہزار 700 زائرین نے روصہ رسول صلی اللہ علیہ وآلہ وسلم پر نذرانہ عقیدت پیش کیا، ریاض الجنہ میں مختلف اوقات میں پابندی اور پرمٹ کے ساتھ 2 لاکھ 12 ہزار 946 افراد نے نماز ادا کی۔مسجد نبوی صلی اللہ علیہ وآلہ وسلم کے امور کی دیکھ بھال کرنے والی اتھارٹی کے مطابق مختلف قومیتوں کے ایک لاکھ 52 ہزار 912 افراد کو متعدد زبانوں میں مواصلاتی خدمات فراہم کی گئیں۔مسجد نبوی صلی اللہ علیہ وآلہ وسلم میں مختلف جگہوں پر روزہ داروں میں 4 لاکھ 83 ہزار 194 افطار پیکٹس فراہم کے گئے۔اتھارٹی نے بتایا کہ آنے والے زائرین کو1810 ٹن زم زم فراہم کیا گیا اسی طرح 218 نمونوں کی جانچ اور تجزیہ کیا گیا۔اس کے علاوہ صفائی اور جراثیم کے خاتمے کے لیے ادویہ اور مادے کا استعمال کیا گیا جس کی مقدار 2 لاکھ 92 ہزار 56 لٹر تھی۔
