پارٹی کی عبوری صدر سونیا گاندھی سے ملاقات کے بعدانہوں نے کی یہ وضاحت
نئی دہلی( ہندوستان ایکسریس ویب ڈیسک): جمعہ یعنی 30 ستمبر کو کانگریس صدر عہدہ کے لیے نامزدگی کی آخری تاریخ ہے۔ اس سے قبل ایک بڑی خبر سامنے آ رہی ہے کہ اشوک گہلوت نے اس انتخاب میں قسمت آزمائی نہ کرنے کا فیصلہ کیا ہے۔قومی آواز ڈاٹ کام کی خبر کے مطابق راجستھان کے وزیر اعلیٰ اشوک گہلوت نے واضح کر دیا ہے کہ وہ کانگریس صدر عہدہ کا انتخاب نہیں لڑیں گے۔ انھوں نے نئی دہلی میں کانگریس صدر سونیا گاندھی سے ملاقات کے بعد میڈیا سے بات کرتے ہوئے کہا کہ میں نے ان کے ساتھ میٹنگ میں پوری بات رکھی۔
میڈیا اہلکاروں نے جب اشوک گہلوت سے یہ سوال کیا کہ کیا وہ وزیر اعلیٰ بنے رہیں گے؟ اس پر انھوں نے جواب دیا کہ ’’یہ فیصلہ میں نہیں، کانگریس صدر سونیا گاندھی لیں گی۔‘‘ اپنے ایک بیان میں اشوک گہلوت نے یہ بھی کہا کہ ’’گزشتہ دنوں کے واقعہ نے ہم سب کو ہلا کر رکھ دیا ہے۔ میں نے سونیا گاندھی سے راجستھان میں پیدا حالات کے لیے معافی مانگی ہے۔ میں نے گزشتہ 50 سال تک کانگریس کے لیے وفاداری کے ساتھ کام کیا، میں سونیا گاندھی کی کرم فرمائی کے سبب تیسری بار وزیر اعلیٰ بنا۔‘‘
اس درمیان کانگریس کے سینئر لیڈر دگوجے سنگھ نے پارٹی رکن پارلیمنٹ ششی تھرور سے ملاقات کی ہے۔ ششی تھرور نے اس ملاقات کے بعد کہا کہ ’’میں کانگریس صدر عہدہ کے لیے ان کی امیدواری کا استقبال کرتا ہوں۔ ہم دونوں اس بات پر متفق ہیں کہ ہمارے درمیان ایک دوستانہ مقابلہ رہا۔ ہم بس اتنا چاہتے ہیں کہ جو جیتے گا، کانگریس جیتے گی۔‘‘ دراصل ششی تھرور نے بہت پہلے ہی کانگریس صدر عہدہ کے لیے انتخاب لڑنے کا اعلان کیا ہوا ہے۔ 30 ستمبر کی صبح وہ نامزدگی کا پرچہ داخل کریں گے۔ دگوجے سنگھ کے بھی اس انتخاب میں کھڑے ہونے کی قیاس آرائیاں گزشتہ کچھ دنوں سے ہو رہی ہیں، اور اب جب کہ ششی تھرور نے ان سے دوستانہ مقابلہ کی بات کہی ہے، تو قوی امید ہے 30 ستمبر کو دگ وجے سنگھ بھی پرچہ نامزدگی داخل کریں۔
