بنگال: بی جے پی کی ریلی میں ’اللہ اکبر‘ کی صدائیں بلند

کولکاتا: جارحانہ مذہبی قوم پرستی، مسلمان مخالف بیانات سے قطع نظربھارتیہ جنتا پارٹی کی ریلی میں ووٹوں کی خاطر ’اللہ اکبر‘ کی صدائیں بلند ہوں تو حیران بالکل نہ ہوں کیوں کہ خبر ہے کہ ایسا بھی ممکن ہو چکاہے۔ میڈیا رپورٹس کے مطابق مغربی بنگال کے علاقے کوچ بہار سے انتخابات میں حصہ لینے والے امیدوار نسیت پرمانک نے تمام تر توجہ اس وقت سمیٹ لی جب بعض میڈیا رپورٹ کے مطابق انہوں نے انتخابی ریلی کے دوران ووٹ مانگنے کے لیے ’اللہ اکبر‘ کے نعرے بلند کئے۔ مغربی بنگال کے علاقے دنہاٹا میں نسیت پرمانک کی حمایت میں گزشتہ روز بی جے پی کی اقلیتی مورچہ ریلی نکالی گئی۔
میڈیا رپورٹس کے مطابق بی جے پی کوچ بہار کے صدر اور ایم ایل اے سوکمار رائے کا کہنا ہے کہ ابھی صرف دو اسمبلی حلقوں سیتائی اور دنہاٹا کے مسلمانوں کے ساتھ ریلی کا انعقاد کیا گیا تھا لیکن جلد ہی ضلع کوچ بہار کے تمام مسلمانوں کے ساتھ ریلی نکالیں گے۔ان کا کہنا ہے کہ اس ضلع سے مسلم پنچایت کے حمایت یافتہ ہماری جماعت کا حصہ ہیں، اس لیے اس ضلع سے اس طرح کی ریلی کا انعقاد کوئی غیر معمولی بات نہیں ہے۔
خیال رہے کہ نریندر مودی کے دور حکومت میں مسلمانوں کے خلاف نفرت انگیز تقاریر و جرائم کے واقعات عام طورپررونما ہوئے ہیں،لیکن شاید یہ پہہلی بار ہوا ہے کہ بی جے پی کی کسی ریلی میں اللہ اکبر کے نعرے بلند کیے گئے ہوں۔