اٹاوہ:23دسمبر(یواین آئی)سماج وادی پاٹی(ایس پی) صدر اکھلیش یادو نے پیر کو کہا کہ راون اور کنس جیسے تانا شاہوں کی طرح بی جے پی کی موجودہ حکومت کا خاتمہ ہوگا۔چودھری چرن سنگھ کی جینتی کے موقع پر چودھری چرن سنگھ پی جی کالج ہیورا میں منعقد پروگرام میں یادو نے بی جے پی پر نشانہ سادھتے ہوئے کہا کہ تانا شاہ حکومتیں زیادہ دن تک نہیں ٹکتی ہے۔ عوام سب کچھ دیکھ رہے ہیں۔کسی بھی دن تبدیلی ممکن ہے۔ انہوں نے رامائن اور مہابھارت کی مثال دیتے ہوئے کہا کہ راون اور کنس جیسے تانا شاہوں کا خاتمہ ہوا اور موجودہ حکومت کا بھی یہی حشر ہوگا۔
سنبھل میں مند ملنے کے سوال پر انہوں نے کہا’یہ ایسے ہی کھودتے رہیں گے اور ایک دن کھودتے کھودتے اپنی حکومت کھود دیں گے۔انہوں نے کہا’بابا صاحب قابل احترام ہیں۔ بی جے پی کے سبھی لیڈروں کو معافی مانگنی چاہئے۔ ریاست میں سارے غلط کام ، زمین پر قبضے بی جے پی کے لوگ کررہے ہیں۔سنگھ سربراہ موہن بھاگوت کے بیان پر تبصرہ کرتے ہوئے انہوں نے طنز کسا’یہ سب سیاست سے متاثر بیان ہے۔اگر وہ(موہن بھاگوت) وزیر اعلی کو ایک بھی فون کر دے تو کوئی سروے اور سارے تنازعات بند ہوجائیں گے۔ یہ بیان سیاسی فائدہ لینے کے لئے دئیے جارہے ہیں۔یادو نے کہا کہ جو لوگ اقتدار میں بیٹھے ہیں۔ انہیں لگتا ہے کہ ان کی حکومت ہمیشہ چلتی رہے گی۔ لیکن عوام سب سمجھ رہے ہیں۔ لوک سبھا میں عوام نے اپنا حساب دکھا دیا۔ اور اسمبلی الیکشن میں نتائج ایسے آئیں گے کہ انہیں پتہ بھی نہیں چلے گا۔
انہوں نے کہا کہ موجودہ سیاست میں اپوزیشن کے سامنے بہت بڑا چیلنج ہے کیونکہ اقتدار میں بیٹھے لوگوں کے پاس وسائل اور حمایت ہے۔پارلیمنٹ کے سرمائی اجلاس کا ذکر کرتے ہوئے انہوں نے کہا کہ بابا صاحب بھیم راؤ امبیڈکر کے احترام میں جب سبھی پارٹیاں متحد ہوئیں تب اقتدار نے ایسا رویہ کیا جوپارلیمنٹ کی تاریخ میں شامناک ہے۔ فرخ آباد کے سرٹیفکیٹ والے ایم پی نے ایسی مہم چلائی جو بڑے بڑے ایکٹروں کو بھی پیچھے چھوڑ گیا۔ حکومت نے واقعہ کو توڑ مروڑ کر پیش کیا اور میڈیا نے بھی ان کی بات کو سچ دکھانے کی کوشش کی۔یادو نے کہا، ”چودھری صاحب کسانوں کے سب سے بڑے لیڈر تھے۔ انہوں نے ہمیشہ کسانوں کے مستقبل کو سنوارنے کے لیے کام کیا۔ نیتا جی (ملائم) نے چودھری صاحب کے ساتھ کام کیا اور ان کے نظریے کو آگے بڑھایا۔ یہ وہی نیتا جی تھے جنہوں نے دیہی علاقوں کے بچوں کو تعلیم اور ترقی کا خواب دکھایا اور اسے سچ کر دکھایا۔
سوشلسٹ نظریہ کو نئی بلندیوں تک لے جانا ہماری ذمہ داری ہے۔ نیتا جی نے اس مٹی پر خون پسینہ بہا کر سماج وادی پارٹی کی بنیاد رکھی۔ ہمیں ان کی میراث کو آگے بڑھانا ہے۔سماج وادی پارٹی کے نظریہ پر زور دیتے ہوئے انہوں نے کہا کہ یہ ملک کی واحد پارٹی ہے جس کے نام میں سوشلزم ہے۔ یہ نظریہ نیتا جی کی محنت اور جدوجہد سے مضبوط ہوا ہے۔ ہمیں اسے عوام تک لے جانا ہے۔گزشتہ انتخابات میں اتر پردیش کے عوام نے سماج وادی پارٹی اور انڈیا اتحاد کو سب سے زیادہ حمایت دی تھی۔ اس پر ہم عوام کا شکریہ ادا کرتے ہیں اور وعدہ کرتے ہیں کہ ان کے مفادات کے لیے جدوجہد جاری رکھیں گے۔اس موقع پر اکھلیش یادو نے ملائم سنگھ یادو کے مجسمے کی نقاب کشائی کرتے ہوئے کہا کہ یہ مجسمہ ان کے نظریے اور جدوجہد کی علامت ہے۔ نیتا جی نے مشکل حالات میں بھی کسانوں، غریبوں اور محروموں کے حقوق کے لیے جدوجہد کی۔
