سری نگر (یو این آئی)کولگام سے تعلق رکھنے والے نوجوان کی لاش گجرات میں پُرا سرار حالت میں برآمد کی گئی۔گجرات کی سردار پٹیل یونیورسٹی میں زیر تعلیم کشمیری نوجوان کی لاش اتوار کی صبح کمرے میں لٹکتے ہوئے پائی گئی۔لواحقین نے الزام لگایا کہ اُن کے لخت جگر کا قتل کیا گیا ہے ۔
اطلاعات کے مطابق سردار پٹیل یونیورسٹی گجرات میں زیر تعلیم کشمیری نوجوان سمیر احمد ٹھوکر ولد محمد شفیع ٹھوکر ساکن نانی بوگ کولگام کی لاش اتوار کی صبح کمرے میں فین سے لٹکتے ہوئے برآمد کی گئی جس کے بعد پولیس کو اس بارے میں مطلع کیا گیا۔
پولیس ٹیم فوری طورپر جائے موقع پر پہنچی او رلاش کو تحویل میں لے کر اس بارے میں لواحقین کو آگاہی فراہم کی۔لواحقین نے نامہ نگاروں سے بات چیت کے دوران بتایا کہ اُن کے لخت جگر کا قتل کیا گیا ہے اور اس معاملے کی اعلیٰ سطحی تحقیقات ہونی چاہئے ۔متوفی کے والد محمد شفیع ٹھوکر نے بتایا کہ اُن کا بیٹا گجرات کی یونیورسٹی میں ایم ایس سی زالوجی کر رہا تھا۔
اُن کے مطابق میرا بیٹا خودکشی کے بارے میں سوچ بھی نہیں سکتا ہے ۔انہوں نے پولیس کے اعلیٰ حکام سے اپیل کی معاملے کی باریک بینی سے تحقیقات کی جائے تاکہ سچائی سب کے سامنے آسکے ۔
