حافظ سعد اورحافظ اصغر شہید کے اہل خانہ سے ملی کونسل بہار کے وفد کی ملاقات

پھلواری شریف (پریس ریلیز)آل انڈیا ملی کونسل کے قومی نائب صدر حضرت مولانا انیس الرحمن قاسمی اور جنرل سکریٹری مولانا عالم قاسمی کی ہدایت پر ملی کونسل بہار کا چھ رکنی وفد مرزا ذکی احمد بیگ آرگنائزر ملی کونسل بہارکی قیادت میں منیا ڈیہہ، سیتامڑھی پہنچا جس میں آل انڈیا ملی کونسل مدھوبنی کے جنرل سیکریٹری مولانا محمد وجہ القمر فلاحی صاحب، مولانا حماد غزالی صاحب رکن کونسل سیتامڑھی، مولانا رضی احمد صاحب بیل موہن،حافظ انصار صدیقی صاحب نائب صدر آل ملی کونسل سیتامڑھی، حافظ فیضان صاحب سیتامڑھی وغیرہ شامل تھے۔ حافظ سعد کے والد محترم محمد مشتاق نے حادثہ کی تفصیل بتائی اور مرحوم کے بڑے بھائی حافظ شاداب نے کاغذی کارروائی کی تفصیل سے آگاہ کیا۔ کونسل کا قانونی عملہ ایڈووکیٹ عامر صاحب جنرل سیکرٹری آل انڈیا ملی کونسل سیتامڑھی اور ایڈووکیٹ سکندر حیات شعبہ لیگل ایڈ ملی کونسل سیتامڑھی و دیگر نے دو روز قبل ہی منیا ڈیہہ کا دورہ کیا تھا، جس کے بعد کیس فائلنگ کا کام بدھ کے روز یقینی ہونا ہے، لیکن سیتا مڑھی ڈی ایم کو اہل خانہ کی جانب سے اب تک کوئی میمورنڈم نہیں سونپا گیا ہے اور نہ ہی کوئی عرضی دی گئی ہے۔ وفد نے انھیں ڈی ایم کو میمورنڈم دینے کی گزارش کی جس میں حافظ انصار صدیقی صاحب نے ہر طرح کے تعاون کا یقین دلایا اور مرحوم کے بڑے بھائی کے دلی میں رہنے سہنے کے تعلق سے بھی گفتگو ہوئی جس پر حافظ انصار صدیقی صاحب نے کہا کہ دلی میں مرحوم کے بھائی کے قیام و طعام میں جو بھی مدد ہوسکے گی وہ کریں گے۔ واضح ہوکہ وفد نے مرحوم کی قبر پر دعاء مغفرت بھی کی۔
نیزمذکورہ وفد کے ارکان حافظ اصغر مرحوم کے گھر بھی گیے اور وہاں اہل خانہ سے مل کر اصغر مرحوم کے قتل کی معلومات حاصل کی اور ان سے حکومت کے ساتھ مضبوط کاغذی کارروائی کا مشورہ دیااورکہا کہ ملک کی موجودہ صورتحال میں ہمیں چاق و چوبند رہنے کی ضرورت ہے نیز جو مستطیع ہیں وہ اپنے گھروں میں بقیہ لوگ اجتماعی طور پر مسجدوں، مدرسوں اور چوک و چوراہوں پر سی سی ٹی وی کیمرے کا ضرور انتظام کریں تاکہ کسی بھی حادثہ کا ثبوت بھی رہے اور ہم اپنی حفاظت کا انتظام بھی کر سکیں۔ اصغر مرحوم کے چھوٹے بھائی محمد ثناء اللہ نے بتایا کہ یہاں سے اب تک کاغذی کاروائی کے طور پر صرف ڈی ایم کو میمورنڈم ہی دیا گیا ہے۔ واضح ہو کہ اصغر مرحوم کے وارثین میں بیوی، تین بیٹیاں اور دو بیٹے شامل ہیں۔ موحوم کے گھر والوں نے کونسل سے ممکنہ تعاون کی درخواست بھی کی ہے جس پر انھیں ہر ممکن مدد دلانے کی یقین دہانی کرائی گئی۔