موتیہاری میں ‘عراقی تنظیم’ کے زیر اہتمام عید ملن تقریب کا اہتمام

موتیہاری (ذیشان الہی منیر) عراقی تنظیم مشرقی چمپارن کے زیر اہتمام مؤرخہ 30 اپریل 2023ء کو تنظیم کے دفتر ڈاکٹرس کالونی موتیہاری میں ایک عید ملن تقریب کا انعقاد کیا گیا ۔ تقریب کا باضابطہ آغاز حافظ شہاب الدین کی تلاوت کلام پاک سے ہوا۔ بعد ازاں مشرقی چمپارن کے مشہور نیورولوجی اور عراقی تنظیم کے ضلعی صدر ڈاکٹر محمد مبین ہاشمی نے مہمان خصوصی جناب پروفیسر علی کلال کو بکے ، توصیف نامہ آور شال اوڑھاکر ان کا خیر مقدم کیا ۔ اس مناسبت سے متعلقہ تنظیم کے بانی ڈاکٹر محمد مبین ہاشمی نے کہا کہ ‘عراقی تنظیم’ کی شکل میں جو پیڑ لگایا تھا اب وہ ثمر آور ثابت ہو رہا ہے ۔ انہوں نے کہا کہ مسلم سماج میں کلال برادری کی حالت شروع سے کمزور رہی ہے جس کی سب سے بڑی وجہ تعلیم سے بیزاری ہے۔ موصوف نے اس موقع سے آگے کہا کہ عراقی برادری کے کمزور طلبہ وطالبات کی اعلیٰ تعلیم کے لئے تنظیم کے بینر تلے بہتر نظم و نسق کیا جائے گا ساتھ ہی انکی تعلیم کی راہ میں حائل تمام دشواریاں حل کی جائیں گی ۔ ڈاکٹر محمد مبین نے مزید کہا کہ وہی قوم ترقی کے اعلی منازل پر فائز ہےجو تعلیمی زیور سے مزین ہے۔ انہوں نے کہا کہ اپنی برادری کے جو بھی طلبہ میڈیکل کے میدان میں آگے بڑھنا چاہتے ہیں انکی بھر پور مدد کی جا ءے گی ۔ استاد شاعر اور ادیب
ڈاکٹر تفضیل احمد تفضیل نے عراقی برادری کے طلبہ وطالبات کو تعلیم سے جوڑنے کی بات کرتے ہوئے کہا کہ یہ برادری تعلیمی،سماجی اور سیاسی اعتبار سے نہایت پسماندہ ہے۔اس لیے اسے ہر اعتبار سے ترقی دینے کی ضرورت ہے۔اس موقع پر اورنگزیب صاحب نے اپنے پیغام میں کہا کہ آج سماج کا ہر طبقہ تعلیم کے میدان میں آسمان کی بلندیوں پر پہنچ چکا ہے لیکن افسوس کلال برادری کی حالت جوں کی توں بنی ہوئی ہے ،لہذا ہماری نئی نسلوں کی بہتر آبیاری کی اشد ضرورت ہے ۔ عید ملن تقریب سے خطاب کرتے ہوئے ماسٹر امیر الدین نے متعلقہ تنظیم کو مضبوط اور پائیدار بنانے اور اردو تعلیم و تعلم کے حصول پر بھی زور دیا ۔دیگر خطاب کرنے والوں میں ڈاکٹر اظہر صاحب، مختار احمد، شاہد اقبال وغیرہ کے نام شامل ہیں ۔ واضح رہے کہ پروگرام کی صدارت انجنیر فخر عالم نے کی۔انہوں نے اپنے صدارتی کلمات میں تنظیم کو ملک گیر سطح پر وسعت دینے کی بات کہی اور اس عزم کا اظہار کیا کہ کلال برادری کے لیے جتنا ممکن ہوسکے مدد کی جائے گی۔ تقریب کی نظامت کی ذمہ داری آل بہار اردو ٹیچر س ایسوسی ایشن کے سکریٹری محمد امان اللہ نے بحسن و خوبی انجام دی ۔ مہمان خصوصی کے طور پر پروفیسر علی کلال صاحب جہان آباد موجود تھے۔ موصوف نے شرکاء سے خطاب کرتے ہوئے کہا کہ یہ وقت سونے کا نہیں بلکہ انقلاب کا ہے۔ آپ لوگ بیدار ہوں، عراقی تنظیم کو تنظیمی سطح پر تحریک دیں، یہ برادری ہر محاذ پر پسماندہ ہے۔ اس لیے اسے زندگی کے مین اسٹریم میں لانے کے لئے متحدہ طور پر کوشش کریں۔ اس کے لیے ہمیں بھی سکھ اور مارواڑوں سے سیکھنے کی ضرورت ہے۔ انہوں نے مزید کہا کہ متعلقہ تنظیم کی شاخیں ضلعی، ریاستی اور ملکی سطح پر قائم کی جائے۔ طلبہ وطالبات کی اعلی تعلیم کے لئے بیت المال کا بہتر نظم کیا جائے اس کے ساتھ ہی پنجابیوں اور مارواڑیوں کی طرح متحد ہو کر اپنی برادری کے لیے بے لوث کام کیا جائے تبھی ہماری برادری سر خرو و کامیاب ہو سکتی ہے۔ پروگرام میں آنے والے سبھی مہمانوں کا اعزاز بھائی افضل صاحب نے گرمجوشی سے کیا اور ان کا استقبال کرتے ہوئے پروگرام میں شامل سبھی مہمانوں کا شکریہ ادا کیا۔ اس موقع پر تنظیم کی طرف سے اردو و ہندی صحافت کے میدان میں بہتر کارکردگی انجام دے رہے صحافیوں میں ڈاکٹر عقیل مشتاق، روزنامہ ہندستان ، عزیر سالم روزنامہ قومی تنظیم’ مہر عالم تیمی روزنامہ سمے ایکسپریس کو ‘عراقی تنظیم کے بانی اور چمپارن کے مشہور نیو رو لوجی ڈاکٹر محمد مبین ہاشمی و دیگر کے ہاتھوں، بکے، مو منٹو ،قلم اور شال اوڑھاکر عزت افزائی کی گئ۔ وہیں میٹرک و انٹر کے امتحانات میں اول پوزیشن سے کامیاب ہونے والے طلبہ وطالبات یاسر عرفات،ساجد عالم،چاندنی، محمد مجتبیٰ، محمد تنویر عامر،محمد توقیر عالم، نفیسہ خاتون، ساحل اقبال، ثانیہ پروین،کیف علی، الطاف حسین،محمد آزاد ہاشمی وغیرہم کو مو منٹو و میڈل دے کر انکی ہمت افزائی کی گئی ۔ عید ملن تقریب کے موقع پر محمد شرف الدین ،ڈاکٹر تفضیل احمد تفضیل ،شمس تبریز ،اظہر عالم ،محمد شاکر ،محمد اورنگزیب ،ایڈووکیٹ خورشید عالم ،شاہد جمیل ،ڈاکٹر محمد اظہر ،انجنیر محسن عالم ،محمد اعظم، ریاض احمد ، شبیر احمد ، ماسٹر انوار احمد، راشد انور،محمد شرف الدین ،صایمہ پروین ،سرور عالم ، تنظیم کے سبھی ذمہ داران کے علاوہ عراقی برادری کے سیکڑوں افراد موجود تھے۔