وفاداری بدلنے والوں میں نیشنل پیپلز پارٹی کے فرلن سنگما اور بینیڈک ماراک کے علاوہ ترنمول کانگریس کے ایچ ایم شانگپلینگ شامل
نئی دہلی (یو این آئی) میگھالیہ میں اگلے سال ہونے والے اسمبلی انتخابات سے قبل چار ایم ایل اے بدھ کے روز پارٹی ہیڈکوارٹر میں بھارتیہ جنتا پارٹی میں شامل ہو گئے۔ تمام اراکین اسمبلی نے این ای ڈی اے کے کنوینر اور آسام کے وزیر اعلیٰ ہیمنت بسوا سرما، قومی ترجمان سمبت پاترا اور دیگر سینئر لیڈروں کی موجودگی میں پارٹی میں شمولیت اختیار کی۔ ان اراکین اسمبلی میں نیشنل پیپلز پارٹی (این پی پی) کے دو ایم ایل اے فرلن سنگما اور بینیڈک ماراک، ترنمول کانگریس کے ایچ ایم شانگپلینگ اور آزاد ایم ایل اے سیموئل سنگما شامل ہیں۔
پارٹی میں شامل ہونے والے ایم ایل اے کو مبارکباد دیتے ہوئے مسٹر ہیمنت بسوا سرما نے کہا کہ آنے والے اسمبلی انتخابات کے پیش نظر ان ایم ایل اے کے پارٹی میں شامل ہونے سے ریاست میں بی جے پی مضبوط ہوگی۔ انہوں نے کہا، "آج یہ ایم ایل اے بی جے پی میں شامل ہوئے کیونکہ انہوں نے شمال مشرق میں وزیر اعظم نریندر مودی کے ترقیاتی ایجنڈے پر اپنا اعتماد ظاہر کیا ہے۔”
مسٹر شانگپلینگ، فرلن سنگما اور بینیڈک ماراک نے گزشتہ ماہ اسمبلی کے اسپیکر میٹباہ لنگڈوہ کو اپنے استعفے سونپ دیے تھے۔
بی جے پی، این پی پی کی زیر قیادت میگھالیہ ڈیموکریٹک الائنس میں اتحادی ہے، جو اس وقت شمال مشرقی ریاست میگھالیہ میں برسراقتدار ہے۔
