ہریانہ حکومت نے کسانوں کو سب سے زیادہ دھوکہ دیا: سیلجا

چنڈی گڑھ، 02 جنوری (یو این آئی) کانگریس کی جنرل سکریٹری کماری سیلجا نے منگل کو کہا کہ ہریانہ کی بی جے پی-جے جے پی مخلوط حکومت کے دور میں اگر کسی کا سب سے زیادہ استحصال اور ہراساں کیا گیا ہے تو وہ کسان ہے۔
کماری سیلجا نے کہا کہ اس حکومت نے ہمیشہ دھوکہ دیا ہے اور سب سے بڑھ کر کسانوں پر ظلم کیا ہے۔ جب کوئی کسان اپنے حقوق کے لیے آواز اٹھاتا ہے تو اسے لاٹھیوں کی مدد سے دبا دیا جاتا ہے۔ حکومت کسانوں سے کیا گیا ایک وعدہ بھی پورا نہیں کر سکی، سرمایہ داروں کے مفادات کا تحفظ کرنے والی حکومت کسانوں کے مفادات کا تحفظ نہیں کر پا رہی ہے۔
کماری سیلجا نے کہا کہ حکومت، زرعی بیمہ کمپنی اور بینک سب ایک دوسرے کے ساتھ ملی بھگت میں ہیں، وہ کسانوں کو خریف 2023 کا انشورنس پریمیم پانچ ماہ بعد واپس کر رہے ہیں، جو کہ قانون میں غلط ہے، اگر کسی کسان نے پریمیم ادا کیا ہے، پھر اس کی فصل خراب ہوتی ہے اسے معاوضہ دیا جائے جو اس کا حق ہے۔ یہی نہیں، حکومت زیادہ تر اضلاع میں ژالہ باری سے تباہ ہونے والی ربیع 2022-23 کی فصلوں کے لیے انشورنس کلیمز بھی جاری نہیں کر پائی ہے۔ کسان اب بھی خریف 2020 کے بقایا معاوضے کا مطالبہ کر رہا ہے۔
انہوں نے کہا کہ بی ٹی کاٹن سیڈ کمپنی حکومتی تحفظ میں کسانوں کو لوٹنے میں مصروف ہے۔ بی ٹی کپاس کا بیج مارکیٹ میں فروخت ہوا جس پر گلابی بول کیڑے کی افزائش بڑھ گئی۔ حکومت نرما کے بی ٹی بیج کو بہتر بنانے کے لیے کوششیں کرے، مارکیٹ میں کم معیار کے بیج جاری کرنے والی کمپنیوں کے خلاف قانونی کارروائی کی جائے۔ کسانوں کو اچھے بیج، کھاد اور کیڑے مار ادویات دستیاب کرائی جائیں، اگر کسانوں کو جعلی بیج، کھاد اور کیڑے مار ادویات سے نقصان ہوتا ہے تو کمپنیاں یا حکومت ان کی تلافی کرے۔