تلنگانہ سیکریٹریٹ کی نئی عمارت کا افتتاح پھر ملتوی

حیدرآباد ( ہندوستان ایکسپریس ویب ڈیسک) تلنگانہ سیکریٹریٹ کا افتتاح دوسری مرتبہ ملتوی کیا جاچکا ہے۔سیاست نیوزکی خبر کے مطابق ریاست میں دو ارکان قانون ساز کونسل کے انتخابات کے اعلامیہ کی اجرائی اور انتخابی ضابطہ اخلاق کے باعث الیکشن کمیشن نے چیف سیکریٹری مسز سانتا کماری کو روانہ مکتوب میں سیکریٹریٹ کی افتتاحی تقریب کیلئے اجازت نہ دینے کا فیصلہ کیا جس پر حکومت کی جانب سے 17فروری کو سیکریٹریٹ کی نئی عمارت کی افتتاحی تقریب کو ملتوی کرنے کا فیصلہ کیا جاچکا ہے۔چیف منسٹر چندر شیکھر راؤ کے دفتر سے جاری اعلامیہ میں افتتاحی تقریب کو ملتوی کئے جانے کے متعلق واقف کروایا گیا۔ تلنگانہ سیکریٹریٹ کی نئی عمارت کے 17فروری کو افتتاح کے سلسلہ میں مختلف گوشوں سے اعتراض کیا جارہا تھا اور کہا جا رہاہے کہ ڈاکٹر بی آر امبیڈکر کے نام سے موسوم عمارت کا چیف منسٹر کی سالگرہ کے موقع پر افتتاح کیوں عمل میں لایا جارہا ہے ۔ واضح رہے کہ گذشتہ دنوں الیکشن کمیشن کی جانب سے اساتذہ کی نشست کے علاوہ حیدرآباد کے ادارۂ جات مقامی کے انتخابات کیلئے اعلامیہ جاری کرکے فوری اثر کے ساتھ انتخابی ضابطہ اخلاق کے نفاذ کا اعلان کیا تھا جس پر چیف سیکریٹری نے الیکشن کمیشن کو مکتوب روانہ کرکے سیکریٹریٹ کی افتتاحی تقریب جو پہلے سے معلنہ تھی کے متعلق وضاحت طلب کی تھی۔ سابق میں کئے گئے فیصلہ کے مطابق سیکریٹریٹ کی نئی عمارت کا گذشتہ ماہ کے اواخر میں افتتاح ہونا تھا لیکن تعمیری کاموں کی عدم تکمیل کے سبب اسے ملتوی کیا گیا تھا اور 17 فروری کو افتتاح مقرر تھا اور اب انتخابی ضابطہ اخلاق کے سبب اس افتتاحی تقریب کو ملتوی کردیا گیا ہے اور آئندہ تاریخ کا اعلان جلدکیا جائے گا۔