نئی دہلی(یو این آئی) انڈین پریمیئر لیگ (آئی پی ایل) 2025 کی میگا نیلامی سعودی عرب کے جدہ میں 24-25 نومبر کو ہوگی۔ یہ دوسرا موقع ہے جب آئی پی ایل کی نیلامی بیرون ملک ہو رہی ہے۔حال ہی میں تمام فرنچائزز نے مجموعی طور پر 46 کھلاڑیوں کو برقرار رکھا جس میں جنوبی افریقہ کے وکٹ کیپر آل راؤنڈر ہینرک کلاسن کو سن رائزرس حیدرآباد نے 23 کروڑ روپے میں سب سے مہنگے کھلاڑی کے طور پر برقرار رکھا ہے۔ ہندوستان کے سابق کپتان ویراٹ کوہلی (رائل چیلنجرز بنگلور) اور ویسٹ انڈیز کے وکٹ کیپر بلے باز نکولس پوران (لکھنؤ سپر جائنٹس) 21 کروڑ روپے کے ساتھ مشترکہ دوسرے مہنگے ترین کھلاڑی ہیں۔
راجستھان رائلز کا دو روزہ نیلامی میں 41 کروڑ روپے کا سب سے چھوٹا بجٹ ہوگا کیونکہ راجستھان رائلز ان دو ٹیموں میں سے ایک تھی جنہوں نے زیادہ سے زیادہ چھ کھلاڑیوں کو برقرار رکھا ہے۔ موجودہ چیمپیئن کولکاتہ نائٹ رائیڈرس نے بھی اپنے کور گروپ سے چھ کھلاڑیوں کو برقرار رکھا ہے، لیکن اس کا بجٹ 51 کروڑ روپے ہوگا۔ نیلامی میں دونوں ٹیموں کے پاس رائٹ ٹو میچ (RTM) کارڈ نہیں ہوں گے۔
پنجاب کنگس کے پاس سب سے بڑا بجٹ ہوگا، جو کہ 110.5 کروڑ روپے ہے، کیونکہ انہوں نے 120 کروڑ روپے کے کل بجٹ میں سے صرف 9.5 کروڑ روپے ہی خرچ کیے ہیں جو کہ ششانک سنگھ اور پربھسمرن سنگھ کو برقرار رکھنے کے لیے ہیں۔ نیلامی میں پنجاب میں زیادہ سے زیادہ چار آر ٹی ایم کارڈز ہوں گے۔ممبئی انڈینز، چنئی سپر کنگس، گجرات ٹائٹنس، سن رائزرس اور سپر جائنٹس نے پانچ کھلاڑیوں کو برقرار رکھا ہے، جس سے نیلامی میں ان کے پاس صرف ایک آر ٹی ایم کارڈ رہ گیا ہے۔رائل چیلنجرز نے تین کھلاڑیوں کو برقرار رکھا تھا۔ اس وجہ سے، ان کے پاس تین آر ٹی ایم کارڈ ہوں گے، جب کہ دہلی کیپٹلس نے چار کھلاڑیوں کو برقرار رکھا ہے اور وہ دو آر ٹی ایم کارڈ کے ساتھ نیلامی میں جائیں گے۔
