یروشلم،3 جنوری (یو این آئی /ایجنسیاں) گزشتہ 24 گھنٹوں کے دوران غزہ کی پٹی پر اسرائیلی حملوں میں کم از کم 28 افراد ہلاک اور 59 زخمی ہوئے ہیں۔غزہ کی وزارت صحت نے ایک بیان میں یہ اطلاع دی۔ بیان میں کہا گیا ہے کہ’’گزشتہ 24 گھنٹوں کے دوران اسرائیلی قبضے نے غزہ پٹی میں پانچ خاندانوں کا اجتماعی قتل عام کیا ہے، جس میں 28 افراد ہلاک اور 59 زخمی ہوئے ہیں‘‘۔بیان میں کہا گیا ہے کہ جنگ کے آغاز سے اب تک غزہ پٹی پر اسرائیلی حملوں میں ہلاکتوں کی تعداد 45,581 ہو گئی ہے، جب کہ 108,000 سے زائد زخمی ہو چکے ہیں۔7 اکتوبر 2023 کو غزہ پٹی سے اسرائیل پر ایک غیر معمولی راکٹ حملہ کیا گیا۔ اس کے علاوہ فلسطینی تحریک حماس کے جنگجوؤں نے سرحدی علاقوں میں گھس کر فوجیوں اور شہریوں پر فائرنگ کی اور یرغمال بنائے۔اسرائیلی حکام کا کہنا ہے کہ چھاپے کے دوران تقریباً 1200 افراد مارے گئے۔ اسرائیلی ڈیفنس فورسز نے جوابی کارروائی کرتے ہوئے غزہ میں آہنی تلواروں کا آپریشن شروع کیا اور انکلیو کی مکمل ناکہ بندی کا اعلان کیا۔
ادھر ددسری اسرائیل اور حوثی ملیشیا کے درمیان کشیدگی اور متبادل دھمکیوں کا سلسلہ جاری ہے۔تازہ ترین پیش رفت میں یمن سے ایک بیلسٹک میزائل بیت المقدس کی سمت داغا گیا۔العربیہ نیوز کے نمائندے نے بتایا کہ اس میزائل کو فضا میں روکنے کی کوشش کے نتیجے میں بیت المقدس کے اطراف زور دار دھماکے سنے گئے۔کئی ماہ سے ایران کی حمایت یافتہ حوثی ملیشیا یہ باور کرا رہی ہے کہ وہ اسرائیل کی دھمکیوں کے باوجود اس کے راستے میں آڑ کے طور پر ڈٹی ہوئی تا کہ غزہ کی پٹی پر مسلط جنگ روکی جا سکے۔حوثیوں نے گذشتہ برس اسرائیل کی سمت میزائل داغے اور دھماکا خیز ڈرون طیارے بھیجے۔ تاہم ان کے نتیجے میں اکثر کوئی بڑا نقصان نہ ہوا۔اس کے جواب میں اسرائیل یمن میں کئی ٹھکانوں پر بم باری کرتا رہا جس کے بارے میں اس کا دعویٰ ہے کہ یہ حوثیوں کے گودام ہیں۔اسرائیلی وزیر اعظم بنیامین نیتن یاہو کی زبانی کئی بار حوثی ملیشیا کے خلاف آئندہ اقدامات کے حوالے سے دھمکیاں سامنے آتی رہی ہیں۔ نتین یاہو کے مطابق یہ یمنی ملیشیا ایران کے محور میں اب واحد ونگ رہ گیا ہے جس نے ابھی تک اسرائیلی طاقت کو نہیں آزمایا ہے۔ادھر اسرائیلی وزیر دفاع یسرائیل کاتز بھی ایران نواز ملیشیا کو اسی طرح کی دھمکیاں دے چکے ہیں۔ ان کا کہنا تھا کہ "حوثیوں کو یہ جان لینا ہو گا کہ ہمارے لمبے ہاتھ ان تک پہنچ جائیں گے”۔
سات اکتوبر 2023 کو غزہ کی پٹی میں جنگ چھڑنے کے بعد سے حوثیوں نے میزائلوں اور ڈرون حملوں کے ذریعے اسرائیل پر درجنوں حملے کیے۔ اس کے علاوہ بحیرہ احمر میں درجنوں مال بردار جہازوں کو بھی نشانہ بنایا۔ حوثیوں کے مطابق یہ کارروائیاں "غزہ کی مدد” کے طور پر کی جاتی ہیں۔البتہ بعض مبصرین کے نزدیک اسرائیل حزب اللہ اور حماس کی بڑی صلاحیتوں کو ختم کرنے کے بعد اب حوثیوں سے نمٹنے کے لیے زیادہ مصمم طور پر تیار ہے۔
