کٹیہار:آل انڈیا مسلم مجلس مشاورت کے قیام کا مقصد امت مسلمہ کے مسائل پر سنجیدگی سے غور کرنا اور اسے حل کرنا ہے۔ یہ بات آل انڈیا مسلم مجلس مشاورت کے جنرل سکریٹری سید تحسین احمد نے کٹیہار میڈیکل کالج کے مہمان خانے میں ایک اجلاس کے دوران کہیں۔ انھوں نے مزید کہا کہ آل انڈیا مسلم مجلس مشاورت کا قیام 1964میں ہوا۔ملک کے بہت ہی مخلص اور مایہ ناز اکابرین میں مولانا ابو الحسن ندوی،ڈاکٹر سید محمود اور بھی بہت سارے ایم پی اور اہم شخصیات اور خاص طور سے کئی تنظیموں کے ذمہ داران نے مل کر اس تنظیم کو قائم کیا۔ انھوں نے کہا کہ مجلس مشاورت کی تحریک پر ہی آل انڈیا مسلم پرسنل لاء بورڈ قائم ہوا۔ اسی طرح انڈیا اسلامک کلچر سینٹر نئی دہلی کے قیام میں بھی مشاورت کا کلیدی کردار رہا۔خاص طور سے جب سید شہاب الدین اس کے صدر تھے تو انھوں نے مشاورت کو نئی پہچان دی۔ اب سپریم کورٹ کے ایڈو کیٹ فیروز احمد مشاورت کے صدر ہیں۔ نئی میقات میں یہ طے ہوا ہے کہ ہر ریاست میں مجلس مشاورت کو مضبوط کیا جائے جب اسٹیٹ مضبوط ہوگا تبھی مشاوت بھی مضبوط ہوگی، اسے ضلع سطح تک پہنچایا جائے۔ہرضلع میں تنظیم سازی کی جائے اس کی شروعات ابھی بہار سے ہوئی ہے۔ 28مئی 2023کو پٹنہ میں ایک مشاورت کا اجلاس رکھا گیا ہے جس میں ہر ضلع سے نمائندگی ہوگی، ریاستی کمیٹی بنے گی اور پھر وہ ڈسٹرکٹ سطح کی کمیٹی بلاک سطح تک پہنچے گی اور وہ اس بات پر نظر رکھے گی کہ ملت کے ساتھ کیا کیا مظالم اور نا انصافیاں ہو ر ہی ہیں۔ جبکہ مشاورت کے سابق قومی صدر نوید حامد نے کہا کہ منفی ذہن سے کوئی کام نہیں کیا جا سکتا ہے۔ یہ ایک مشاورت کا ایک مینڈیٹ ہے۔ اس کے ساتھ ساتھ ملک میں جو فرقہ وارانہ کوششیں کی جارہی ہیں اس کو دور کرنے کی کوشش کی جائے گی۔تمام ضلع کے لوگوں سے درخواست کی جارہی ہے کہ آئندہ 28مئی 2023کے اجلاس میں ہر مکاتب فکر کے لوگ شامل ہوں۔ یہ اجلاس گیان بھون پٹنہ میں منعقد کی جائے گی، اس اجلاس میں جمعیۃ علماء ہند، ادارہ شر عیہ،جمعیت اہل حدیث ہند، جماعت اسلامی ہند،ملی کونسل، شیعہ سنی اور سنی علماء وغیرہ کو اس میں شرکت کرنے کی دعوت دی گئی ہے۔ اس موقع پر اجتماعی معاملات اور مسائل پر غور و فکر ہوگا، اس کے بعد ایک منظم اور مربوط حکمت عملی تیار کر کے اسے حل کرنے کی کوشش کی جائے گی۔ اس موقع پر الکریم یونیورسٹی کے چانسلر ڈاکٹر اشفاق کریم نے آئے ہوئے مہمانوں کا اور شریک مقامی رہنماؤں کا تہ دہل سے شکریہ ادا کیا۔ اس موقع پر ایم ایس ضحی، محمد شمیم اقبال، ڈپٹی میئر منظور خان،محمد شمی، مولانا انعام الحق مدنی، ڈاکٹر حمت اللہ سلفی، محمد صغیر، محمد مجیب الرحمان، محمد اظہر شیخ،محمد امتیاز حیدر، پروفیسر انور برج، محمد شیر شاہ وغیرہ موجود تھے۔
