مودی اتوار کو ادے پور-جے پور وندے بھارت ٹرین کوہری جھنڈی دکھائیں گے

جے پور (یو این آئی) وزیر اعظم نریندر مودی راجستھان کے ادے پور سے جے پور کے درمیان چلنے والی دیسی ٹیکنالوجی سے لیس سیمی ہائی اسپیڈ وندے بھارت ایکسپریس ٹرین کو 24 ستمبر کو نئی دہلی سے ریموٹ ویڈیو لنک کے ذریعے ہری جھنڈی دکھائیں گے۔
وندے بھارت ایکسپریس ٹرین کے ادے پور سے جے پور کے درمیان چلائی جانے والی افتتاحی خصوصی ٹرین سروس کے آغاز کے موقع پر ادے پور میں منعقد ہونے والی تقریب میں ایم پی ارجن لال مینا اور دیگر عوامی نمائندے موجود رہیں گے۔
نارتھ ویسٹرن ریلوے کے چیف پبلک ریلیشن آفیسر کیپٹن ششی کرن کے مطابق، ادے پور سے جے پور کے درمیان چلنے والی وندے بھارت ایکسپریس سے اس روٹ کے مسافروں کو ہموار اور تیز رفتار سفر کا تجربہ ملے گا۔ وندے بھارت ٹرین کے چلنے سے ماولی کے قریب شری ناتھ جی مندر، ناتھ دوارہ اور کھاملیگھاٹ اور گورم گھاٹ جیسے سیاحتی مقامات، بھیلواڑہ کی ٹیکسٹائل انڈسٹری، اجمیر میں واقع تیرتھراج پشکر اور خواجہ معین الدین چشتی کی درگاہ اور کشن گڑھ کے ماربل انڈسٹری کو فائدہ اور فروغ ملنے کا قوی امکان ہے۔