گجرات میں500کے قریب غیر ملکیوں زیر حراست

احمد آباد(ایجنسیاں)جموں و کشمیر کے پہلگام میں 22 اپریل کو ہوئے دہشت گردانہ حملے میں 26 لوگوں کی موت کے بعد پورا ملک سوگ میں ہے۔ اس حملے میں ہلاک ہونے والوں میں تین کا تعلق گجرات سے تھا۔حملے کے بعد حکومت نے پاکستان پر ‘الزام’ عائد کیا اور سندھ طاس معاہدہ معطل کرنے کے ساتھ ساتھ پاکستانی شہریوں کے ویزے بھی منسوخ کر دیے۔پھر جمعہ کو مرکزی وزیر داخلہ امت شاہ نے تمام ریاستوں کے وزرائے اعلیٰ کو ہدایت کی کہ وہ اپنی ریاستوں میں مقیم پاکستانی شہریوں کی شناخت کریں اور انہیں واپس بھیجنے کے لیے مناسب کارروائی کریں۔اس کے بعد ہفتہ کی صبح گجرات کے احمد آباد اور سورت میں مقامی پولیس نے مبینہ بنگلہ دیشی اور دیگر غیر ملکی شہریوں سمیت 500 سے زائد افراد کو حراست میں لے لیا۔ یہ لوگ مبینہ طور پر غیر قانونی طور پر ہندوستان آئے تھے۔
گجرات پولیس کی اس کارروائی کے بعد پولیس کے قافلے کی تصاویر اور حراست میں لیے گئے لوگوں کے ہجوم کی ویڈیوز سوشل میڈیا پر وائرل ہوگئیں۔وائرل ہونے والی ویڈیو میں دیکھا جا سکتا ہے کہ قافلے کے دونوں طرف پولیس اہلکاروں کی قطاریں لگی ہوئی ہیں اور بڑی تعداد میں حراست میں لیے گئے افراد جن میں مرد و خواتین بھی شامل ہیں قافلے کے بیچ میں چل رہے ہیں۔ایک اور ویڈیو میں کئی زیر حراست افراد پولیس قافلے کے اندر قطاروں میں بیٹھے ہوئے دکھائی دے رہے ہیں۔اب تک موصول ہونے والی معلومات کے مطابق پولیس نے یہ کارروائی احمد آباد کے چندولا، سورت، راجکوٹ اور گجرات کے مہی ساگر ضلع کے کچھ علاقوں میں کی ہے۔
احمد آباد پولیس کمشنر نے احمد آباد میں رہنے والے دراندازوں کو گرفتار کرنے کی ہدایت دی تھی۔ اس کی بنیاد پر، اپریل 2024 سے اب تک، کرائم برانچ نے اس سلسلے میں دو ایف آئی آر درج کی ہیں اور غیر قانونی طور پر رہنے والے 127 بنگلہ دیشیوں کو گرفتار کیا گیا ہے۔ ان میں سے 77 کو ملک بدر کرنے اور کچھ کو ڈی پورٹ کرنے کا حکم دیا گیا ہے۔گرفتار لوگوں سے ملنے والی معلومات کی بنیاد پر پتہ چلا کہ چندولہ کے آس پاس بڑی تعداد میں بنگلہ دیشی رہ رہے ہیں۔ آج صبح ڈی سی پی زون 6، ڈی سی پی کرائم، ڈی سی پی ایس او جی نے بڑی تعداد میں پولیس والوں کے ساتھ مل کر یہاں تلاشی مہم شروع کی۔ یہ آپریشن صبح 2 بجے سے جاری ہے۔اب تک ہم نے 457 افراد کو حراست میں لیا ہے۔ کرائم برانچ کے دفتر میں ان سے پوچھ گچھ کی جائے گی۔ اگر اس بات کی تصدیق ہو جاتی ہے کہ یہ لوگ بنگلہ دیشی شہری ہیں اور یہ ثابت ہو جاتا ہے کہ وہ غیر قانونی طور پر ہندوستان میں داخل ہوئے ہیں اور یہاں آنے کے بعد ان کے شناختی کارڈ بنوائے ہیں، تو ہم انہیں ملک بدر کرنے کا عمل شروع ہوگا۔
اس کے علاوہ سورت شہر سے پولیس کی ایک ٹیم نے 100 سے زیادہ بنگلہ دیشیوں کو حراست میں لیا ہے۔ ان لوگوں کے بارے میں بتایا گیا ہے کہ وہ مبینہ طور پر جعلی دستاویزات کے ساتھ ہندوستان آئے تھے۔اس پولیس ٹیم میں اسپیشل آپریشن گروپ، کرائم انویسٹی گیشن برانچ اور اینٹی کرائم برانچ کے افسران شامل تھے۔اسپیشل آپریشنز گروپ کے ڈی سی پی راجدیپ سنگھ نکم نے کہا، ’’تفتیش کے بعد ان سبھی کو بنگلہ دیش بھیج دیا جائے گا‘‘۔ موصول ہونے والی معلومات کے مطابق ریاستی حکومت کی ہدایات کے بعد پولیس نے مہی ساگر ضلع میں غیر قانونی طور پر رہنے والے لوگوں کی تلاش بھی شروع کر دی ہے۔ اس دوران خانپور تعلقہ کے کرنتا گاؤں کے نو لوگوں سے پوچھ گچھ کی گئی۔