کیجریوال کو ای ڈی نہیں بلکہ بی جے پی سمن بھیج رہی ہے :راگھو چڈھا

نئی دہلی، 21 دسمبر (یو این آئی) عام آدمی پارٹی ای ڈی نے مبینہ شراب گھوٹالہ کو فرضی قرار دیتے ہوئے کہا کہ وزیر اعلی اروند کیجریوال کو سمن ای ڈی نہیں بلکہ بی جے پی بھیج رہی ہے۔عام آدمی پارٹی کے سینئر لیڈر اور راجیہ سبھا ممبر پارلیمنٹ راگھو چڈھا نے آج کہا کہ یہ پورا معاملہ فرضی ہے۔ اس معاملے میں نہ تو ایجنسیوں کے پاس کوئی ثبوت ہے اور نہ ہی کوئی معاملہ گڑبڑہے۔ یہ ساری سازش عام آدمی پارٹی اور اروند کیجریوال کو پھنسانے کے لیے رچی گئی ہے۔مسٹر چڈھا نے کہا کہ مسٹر کیجریوال نے پچھلے سمن میں ای ڈی سے سوال کیا تھا کہ آپ مجھے بطورگواہ یا ملزم کے طور پر کیوں بلا رہے ہیں۔ اس کے ساتھ یہ بھی بتائیں کہ مجھے کس کیس میں طلب کیا جا رہا ہے لیکن ان سوالوں کا کوئی جواب نہیں آتا، اس کے بجائے دوسرا سمن بھیج دیا جاتا ہے۔
عام آدمی پارٹی کےلیڈر نے کہا کہ وزیر اعلی اروند کیجریوال پچھلے 25 سال سے ہر سال وپسنا کے لیے جا رہے ہیں۔ ایسے میں جب سب کو معلوم تھا کہ وزیر اعلیٰ اروند کیجریوال نے ہفتے میں 10 دن پہلے ہی وپسنا جانے کا منصوبہ بنایا ہے۔ اس لیے اس کا مطلب صرف یہ ہے کہ ایجنسیوں نے جان بوجھ کر ایسے وقت میں سمن بھیجے۔انہوں نے کہا کہ سمن بھیجے جانے سے پہلے ہی بی جے پی لیڈر میڈیا میں اس کا اعلان کر دیتے ہیں۔ ہمیں لگتا ہے کہ یہ سمن ایجنسی نے نہیں بلکہ بی جے پی نے بھیجا ہے۔ یہ پورا معاملہ سیاسی ہے اور ہم اس کی تردید کرتے ہیں۔ مسٹر کیجریوال اور عام آدمی پارٹی ایسے معاملات سے خوفزدہ نہیں ہیں اور ہم اس کا مضبوطی سے مقابلہ کریں گے۔