چیئرپرسن کوثر جہاں کی متعلقہ افسران سے ملاقات
نئی دہل (پریس ریلیز): حج بیت اللہ2023کے لیے پہلے مرحلے کی حج پروازوںکا سلسلہ شروع ہونے میں اب محض12دن باقی رہ گئے ہیں۔پہلے سے اعلان شدہ شیڈول کے مطابق ہندوستان کے سب سے بڑے امبارکیشن پوائنٹ دہلی سے حج پروازیں21؍مئی2023سے شروع ہونگی۔ ایسے میں دہلی اسٹیٹ حج کمیٹی کی جانب سے حج آپریشن2023کے لیے بہتر سے بہتر انتظامات اور کارکردگی کو یقینی بنانے کے پیش نظر مختلف سطحوں پر تیاریوں اور حج امور کی انجام دہی سے متعلق مرکزی اور صوبائی وزارتوں اور محکموں کے ساتھ ملاقاتوں اور میٹنگ کا سلسلہ جاری ہے۔ اسی سلسلے میں دہلی حج کمیٹی کے ایگزیکٹو آفیسر جناب اشفاق احمد عارفی کی طرف سے فراہم اطلاع کے مطابق حج کمیٹی کی چیئرپرسن کوثر جہاں نے آج وزارت داخلہ، حکومت ہند اور وزارت شہری ہوا بازی کے مختلف افسران و ذمہ داران سے ملاقاتیں اور صلاح و مشورہ کئے نیز انہوں نے دہلی کے میونسپل کارپوریشن کے ڈپٹی میئر جناب آل محمد اقبال سے بھی ملاقات کی اور دہلی اسٹیٹ حج کمیٹی کی جانب سے دہلی کے تاریخی رام لیلامیدان میں لگنے والے حج ٹرانزٹ کیمپ اور اس کے لیے دہلی میونسپل کارپوریشن کی جانب سے فراہم کی جانے والی سہولیات پر تفصیل کے ساتھ تبادلہ خیال کیا، ڈپٹی میئر جناب آل محمد اقبال نے اپنی اور میونسپل کارپوریشن کی جانب سے تمام تر مطلوبہ تعاون کی فراہمی کی یقین دہانی کرائی۔
واضح ہو کہ گذشتہ دنوں دہلی انٹرنیشنل ایئر پورٹ کے مختلف محکموں اور سعودی ایئرلائنس کے افسران بھی چیئرپرسن محترمہ کوثر جہاں اور ایگزیکٹو آفیسر جناب اشفاق احمد عاری، ڈپٹی ایگزیکٹو آفیسر جناب محسن علی کے ہمراہ حج منزل اور رام لیلا میدان کا معائنہ کرچکے ہیں اورآئندہ 9؍مئی2023 اور10؍مئی2023 کو بالترتیب، حکومت دہلی کے مختلف محکموں بشمول دہلی پولیس، دہلی جل بورڈ، محکمہ صحت، اور دہلی امبارکیشن پوائنٹ اندرا گاندھی انٹرنیشنل ایئرپورٹ کے مختلف ایجنسیوں کے ساتھ میٹنگ کی تجویزہے۔
دہلی اسٹیٹ حج کمیٹی کے ایگزیکٹو آفیسر جناب اشفاق احمد عارفی نے بتایا کہ اس سال عازمین حج کو بہترسے بہتر سہولیات اور حج کیمپ میں بہترقیام کے لیے مسجد سید فیض الٰہی میں لگنے والے حج کیمپ کے علاوہ رام لیلا گراونڈ میں لگائے جانے والے کیمپ کو بھی مکمل طور پر ایئر کنڈیشن بنایا جائے گا۔
