ممبئی(یواین آئی)آل انڈیا مسلم پرسنل لاء بورڈ کی جانب سے 5،اکتوبر کو اوقاف کی حفاظت اور مجوزہ سیاد قانون کی مخالفت میں ایک بڑا جلسہ عام ممبئی میں منعقد کرنے کا فیصلہ کیاہےجوکہ جنوبی ممبئی میں واقع مشہور تعلیمی ادارہ انجمن اسلام میں منعقد کیاجائے گا۔
آل انڈیا مسلم پرسنل لاء بورڈ کے ممبئی میں مقیم اراکین و دیگر ہمدردان کی ایک میٹنگ میں یہ فیصلہ کیا گیا،میٹنگ میں بورڈ کے مرکزی اکابرین کی ہدایت کے مطابق یہ بھی طے کیا گیا کہ اوقاف کے مسائل سے واقف کرانے اور نئے مجوزہ قانون کی خرابیوں کو واضح کرنے کے لئے مہاراشٹرا کے سیاسی لیڈران سے ملاقات کی جائے ، ساتھ ہی ممبئی و قرب جوار کے اُن ممبران پارلیمنٹ سے بھی ملاقات کی جائے جنھیں مشترکہ پارلیمانی کمیٹی (جے پی سی ) کا رکن بنایا گیا ہے چنانچہ اس سلسلے میں اقدامات کاآغاز ہو چکا ہے ۔
آل انڈیا مسلم پرسنل لاء بورڈ کی اوقاف کمیٹی برائے مہاراشٹرکے کنونیر مولانا محمود احمد خاں دریا بادی نے بتایا ہے کہ ۵ اکتوبر کو ہونے والے اجلاس کے لئے ملک کے ممتاز علماء کرام، دانشوران اورماہرین قانون کو دعوت دی جا رہی ہے، اس سلسلے کی مزید تفصیلات سے وقتاً فوقتاً آگاہ کیا جاتا رہے گا، اراکین بورڈ نے علماء کرام و ائمہ مساجد سے یہ بھی درخواست کی ہے کہ اپنے بیانات و خطبات میں اوقاف کی اہمیت ضرورت ، اور فضائل سے عوام کو آگاہ کرتے رہیں ۔ انجمن اسلام کی میٹنگ میں ، ڈاکٹر ظہیر قاضی ، مفتی سعید الرحمان ، سلیم موٹر والا اور خود مولانا محمود دریا بادی،مولانا برہان الدین قاسمی ، مولانا رشید احمد ، حافظ اقبال چونا والا ، شاکر شیخ ڈاکٹر عظیم الدین اورتحقیق الرحمن ودیگر شریک تھے۔
